Solucións xa!

"Outros virán, que bo me farán", frase popular do século IV. Despois da toma de posesión dos novos cargos da Consellaría de Sanidade, queda pendente o tema de buscar solucións aos múltiples problemas sanitarios que presenta Galicia. A diagnose está feita e débense aplicar medidas (incluso "cirúrxicas") que precisa o sistema. Entidades relacionadas coa defensa da sanidade pública sempre dixemos que o orzamento necesario para manter un sistema sanitario do primeiro mundo debe alcanzar 25% do total para "gastar" en saúde. Isto é o que recomenda a OMS. Pero escoitando as declaracións dos responsables, creo que é unha misión imposible. A Consellaría de Sanidade pretende deixar concellos sen pediatras. Algo ao que non se atreveron os anteriores titulares de departamento. Este é un tema moi serio e o Partido Popular non ten reparo xa en dicilo e facelo sen remordemento ningún. Mandarán as nenas e nenos ás cabeceiras de comarca para seren atendidos, co cal o concepto de que a Atención Primaria ten que ser accesible e próxima, pérdese por completo. Supón deixar sen atención pediátrica próxima miles de menores, cuxas familias deberán desprazarse quilómetros para recibir atención especializada, ofrecida por persoal de pediatría que non coñece as crianzas, as súas familias, a comunidade onde residen, etc. Unha práctica que conduce ao abandono da prevención e promoción de saúde, a non seguir o Programa do Neno San, a non identificar as enfermidades graves, etc. Os médicos e médicas de familia non teñen unha formación regrada para atender a poboación infantil. As familias terán que perder tempo en andar grandes distancias para serren atendidas, recorrer a pediatras privados ou contratar seguros complementarios. A estratexia está clara: desmantelar, para favorecer á privada! Menos recursos no verán O conselleiro de Sanidade tamén dixo que "temos que dar ás listas de espera unha importancia relativa, xa que o importante son os resultados que teñan esas listas na saúde dos pacientes". Non fai falla ser un experto para saber que unha enfermidade no é o mesmo collela a tempo, que pasados uns meses ou mesmo anos. Efectivamente o importante é o resultado, e evidentemente será moito peor si se trata máis tarde. Non está na idea dos responsables políticos resolver os problemas sanitarios. Por certo, no último informe de xuño a decembro do 2023, as listas de agarda aumentan en seis das sete áreas Sanitarias. O Sergas vai fechar 780 camas nos hospitais galegos este verán, que son 115 máis que no verán anterior. Sen comentarios! Non está na idea dos responsables políticos resolver os problemas sanitarios A última idea brillante da Consellaría de Sanidade é buscar persoal médico 'veraneante' para cubrir vacantes (o de pagar un soldo digno, eliminar a precariedade e a inestabilidade laboral, diso nin falan…). Os e as médicas que "teñan unha segunda residencia no Barbanza e que poidan traballar no verán en centros de saúde da comarca, cubrirán as vacantes que se produzan na época estival", unha tolería! Recentemente o Sergas e os Colexios Médicos alcanzaron un acordo para aplicar o Sistema de Citas de Atención Primaria. Ponse así fin a meses de conflito polo XIDE, que acabou nos tribunais. Por certo, todo isto, sen contar co persoal de servizos xerais (PSX) que é a parte principal deste sistema de triaxe. O 23 de xuño, en Silleda, Terán lugar os exercicios da fase de oposición do proceso selectivo para o ingreso na categoría de persoal estatutario de médico de familia de Primaria. Aspiran 600 médicos e ofertan 271 prazas: como que non temos médicos? Deixan, de forma deliberada, 329 fóra, cando todos sabemos a falta que fan. Algunha solucións O PP, no Consello Interterritorial do Sistema Nacional de Saúde, de todo o Estado, solicita que o Ministerio cometa unha ilegalidade, permitindo que os MIR que non remataron o seu período de formación, poidan traballar no sistema. Kafkiano! A Plataforma SOS Sanidade Pública de Galicia, ven de elaborar un informe onde recolle 13 medidas para solucionar a problemática da atención sanitaria na Galiza: aumento de orzamento, garantir a accesibilidade aos centros de saúde, ampliar a carteira de servizos para dar unha atención integral, combater a medicalización, políticas de persoal incentivadoras para todas as categorías, rematar coa precariedade e a inestabilidade laboral, mellorar a formación do persoal e avaliar as innovacións que se produciron nos últimos anos, etc. Temos xestores da nada, sempre poñendo escusas para non ter os medios materiais e humanos necesarios, para que teñamos unha sanidade de calidade. Que pena!