A convocatoria dirixida á totalidade da prensa e a insólita retransmisión en directo dos medios que directamente dependen da maioría parlamentar do Partido Popular –TVG e Radio Galega- provocaron a reacción dos sindicatos, que voltaron a cualificar de electoralista o evento nun acto que organizaron, xa á tarde, para denunciar “as mentiras” do Partido Popular a respecto da carga de traballo no estaleiro.
Nun comunicado, a sección sindical da CIG definiu como “sospeitosa a grande difusión que (Navantia) lle deu ao evento”. A central nacionalista criticou asimismo que o corte de chapa atenderá “únicamente a uns intereses electorais” e, nese sentido, lembrou que as quendas dos cadros de persoal que teñen que dar continuidade aos traballos “non están constituídas a día de hoxe”.
De feito, sinala que a previsión de inicio do “traballo real” non será antes de ben entrado o mes de xuño. O sindicato apuntou tamén que este fito da construción dun buque se celebra cando está a piques de rematar a campaña electoral das europeas do vindeiro domingo, que xa comezara co anuncio dun buque “gris”, o famoso BAM para a Armada española. “Non teñen rubor ningún”, manifestou a sección sindical da CIG, que sinala precisamente a quen fai este tipo de anuncios como “responsábeis da falta de carga de traballo que sufrimos”.
A CIG denuncia o eleitoralismo do acto e que as quendas dos cadros de persoal "non están constituídas a día de hoxe"
Tamén o denominado sector crítico de CCOO cargou contra o PP, cuxo “triunfalismo”, dixo, a través dun comunicado, “é totalmente infundado, unha auténtica manipulación”. Segundo as súas contas, no mellor dos casos –é dicir, se canda o flotel sae adiante en breve o BAM ou o parque de eólica mariña para Iberdrola en Alemaña- a ocupación media será de 1,7 millóns de horas anuais, insuficiente para ocupar o plantel de Navantia Ferrol -2.300 persoas- e sen a penas repercusión na industria auxiliar, que perdeu perto de 3.000 empregos nestes dous últimos anos. Por contra, o sector crítico de Comisións lembra que na década anterior, a carga de traballo anual media situouse en 4,2 millóns de horas.
