O secretario xeral do PSdeG, José Ramón Gómez Besteiro, avanzou esta segunda feira nunha reunión co comité de Alcoa en San Cibrao que o Goberno central prevé autorizar en próximos días tres parques eólicos que dotarán de enerxía ao complexo de Cervo (A Mariña).
Segundo expón nun comunicado, xunto outros dous parques aprobados a comezos deste mes -Tesouro (50,4 megawatts) e Santuario (161 megawatts)-, estas instalacións sumarán un total de 500 megawatts.
En concreto, os tres novos eólicos serán os de Barqueiro (126 megawatts), Badulaque (102,4 megawatts) e Moeche (50,4 megawatts).
O líder socialista trasladou esta información como "boas noticias" para facilitar enerxía "limpa e máis barata" á planta situada na Mariña. Neste encontro -no que tamén participaron a alcaldesa socialista de Viveiro, María Loureiro, e o alcalde de Foz, Francisco Cajoto- Besteiro- mostrou o compromiso do Goberno coa "continuidade e a viabilidade" da produción de aluminio e alúmina para que "se cumpra o acordo entre Alcoa e o cadro de persoal".
Por último, Besteiro rematou por desexar que ese acordo fose "con esta empresa ou con outra solvente".
Peticións do comité
Pola súa parte, o comité de empresa reclamou a Besteiro que intermedie ante o Ministerio para a Transición Ecolóxica para a aprobación dos nós dos parques que foron aprobados con declaración ambiental positiva, "mais catro días fóra de prazo por parte do Ministerio".
Ademais, o comité pide reunións mensuais para saber do avance dos parques eólicos. Paralelamente, sinala que está pendente reunirse coa Xunta polo tema da balsa de lodos.
