entrevista

David Calviño, xunto con Rubén Rial, é un dos fundadores da editorial Baixo Terra, que vén de publicar 'Onda Vital!!', un fanzine colectivo sobre o pouso que deixou o anime xaponés na Galiza. Calviño aborda tamén a próxima publicación da editorial: Croio Nº 0, que sairá a finais deste mes.

Un acordo do PSdeG co BNG permitiu que o historiador e arqueólogo Anxo Rei Arca (Padrón, 1989) puxese fin a 12 anos de Alcaldía do PP na capital da comarca do Sar. Padrón conta cunha sólida situación económica e no seu amplo patrimonio cultural dispón das fundacións Rosalía de Castro e Camilo José Cela. Para Arca, Padrón ten que dar o salto dun concello ancorado operativamente na etapa predixital a crear as condicións urbanísticas e sociais para atraer máis poboación.

Paula Chaves (Cambados, 1995) é coñecida musicalmente como Pauliña, mais no último ano tamén desenvolveu outra faceta profesional súa ao converterse nunha das protagonistas de O home e o can, o filme de Ángel de la Cruz que vén de chegar aos cinemas.

O Campionato Galego de Boxeo que se desenvolveu a pasada fin de semana no Pavillón de Baltar de Sanxenxo viu como o novísimo púxil Silvestre Gómez (Noia, 2004) prolongaba a súa extraordinaria xeira de resultados no certame nacional, onde conta as súas participacións por vitorias.

Tyler McKechnie é o fundador de Oístes? Teatro e a metade do equipo creativo de Falta Esperanza, unha experiencia inmersiva arredor da lectura das últimas vontades da tía Esperanza e coa súa voz retumbando desde o Alén.

Uxía Gayoso foi galardoada co Premio Supernova no Festival Internacional de Cinema Curtocircuíto pola súa obra 'Noitevella 1999', unha curta que reproduce as gravacións atopadas dunha familia que agarda con incerteza o cambio de século e as súas posíbeis consecuencias.

Fernando Ramallo, sociolingüista, aborda algúns dos temas fundamentais sobre a situación da lingua galega no seu novo libro, Que pasa co galego? (Xerais), reunindo cuestións clásicas deste debate, mais tamén outras actuais como o seu papel na intelixencia artificial ou os desafíos para o futuro.

Yolanda Castaño (Compostela, 1977) vén de recibir o Premio da Cultura Galega logo de que o seu libro Materia (Xerais) conseguise o da Crítica e o Nacional de Poesía, nunha sorte de karma para quen sempre puxo por riba o pulo da escrita á estabilidade material. O difícil, di, foi estar case trinta anos contradicindo a quen lle insistían en que non se podía vivir da poesía e menosprezaban as "rapazas" que "ían de poetas". Co achado na man, vindica as que a precederon e reforza a necesidade de abrir camiño para as que virán, como ela, a facer o imposíbel para alcanzar o que xa non o é. 

Branca Trigo, poeta e música, reflexiona sobre a situación actual da poesía como unha das convidadas en representación da editorial Malafera á mesa redonda que organizou en Compostela o Festival Luz Poética.

Unha alianza entre o BNG (3 edís) e o PSdeG (2) superou en Samos (comarca de Sarria) a representación do PP (4) nas eleccións municipais, que levou como candidato Miguel Gallego, fillo do que fora alcalde socialista entre 2007 e 2023. Samos, con rexedora agora do BNG, a empregada de banca Chus López (Airexe, Samos, 1984), linda con outro concello de Alcaldía nacionalista, A Pobra do Brollón (Lemos), dous municipios con Alcaldía socialista, Láncara (Sarria) e Pedrafita do Cebreiro (Os Ancares); e tres do PP, Folgoso do Courel (Quiroga), O Incio e Triacastela (ambos en Sarria). Camiña Sarria gañou ademais a Alcaldía no concello homónimo. 
 

Aníbal Malvar (A Coruña, 1964), xornalista e escritor, publicou, hai 30 anos, o libro Un home que xaceu aquí, que agora volve ser editado por Galaxia.

Miguel García-Fernández é licenciado en Historia coas especialidades de Historia medieval e Historia moderna (USC, 2011) e con grao (USC, 2012), así como experto en Estudos Medievais Europeos (USC, 2012). Colabora no coleccionábel '30 Torres e Castelos para descubrir o Reino da Galiza' e, a respecto desta publicación, conversa con 'Nós Diario' sobre a súa importancia así como a riqueza da historia da Galiza.

Leticia Barbadillo, mestra de educación infantil, é a autora de A botella de lentellas, a obra galardoada co Premio Merlín de Literatura Infantil de Xerais. Nela, Manuel, o neno protagonista, intentará facer as orellas de Entroido que preparaba a súa avoa e, tras un incidente, comezará a imaxinar as historias que ela xa non lle pode contar.

Conversar con Paula Blanco (Noia, 1999) é facelo cunha desas campioas galegas anónimas que non obtén o recoñecemento que merece pese a ser a mellor nunha disciplina que, como a maioría das non maioritarias, non podería desenvolver sen o apoio da súa familia ante a escaseza das axudas das Administracións.

Marcos Gallego (A Veiga, comarca de Valdeorras, 1958) é un dos organizadores de Mares da Fin do Mundo, un festival comprometido coa creación audiovisual, mais tamén co medio marítimo e o sector pesqueiro, e que se celebrará en Outes (comarca de Noia) até o 5 de novembro.

Como cada domingo desde hai xa case dous anos, a veciñanza de Moaña concentrouse onte de novo diante do centro de saúde, que arrodearon cunha cadea humana, para reivindicar máis unha vez a restitución das Urxencias e o reforzo das ambulancias no municipio, que aínda non recuperou os servizos de atención sanitaria dos que dispuña antes da pandemia. As e os case 20.000 moañeses, pois, teñen que ir até Cangas para que os atenda un médico entre as 15 horas e as 7h da madrugada, pois nese horario o seu centro de saúde fica fechado. 'Nós Diario' conversa coa alcaldesa, Leticia Santos (BNG), sobre a incansábel loita de Moaña que agora encadea xa cen semanas consecutivas de protestas.

Os Premios da Crítica chegan hoxe á súa 46ª edición e nesta ocasión decidiron recoñecer de maneira extraordinaria Bieito Ledo polo seu papel como presidente fundador dos galardóns.

Edelmiro Méndez deixou tras de si un arquivo fotográfico inmenso a través do que achegarse á Galiza do século pasado. Unha obra de gran valor etnográfico que a editorial Canela publica co título 'Edelmiro Méndez. Da Terra que fomos'. O libro recompila o traballo deste fotógrafo da Pontenova (A Mariña) realizado entre 1957 e 1964 e conta coa colaboración de Xosé Manuel Méndez, fillo do fotógrafo. Será presentado hoxe, ás 20.30 horas na Casa da Cultura da Pontenova.

Despois de sucesivos gobernos encabezados por rexedores do PSdeG, o PP, que levaba dezaseis anos sen a Alcaldía da Guarda, volve ostentala co avogado Roberto Álvarez Carrero (A Guarda, 1973). Carrero, que exerceu como crego entre os anos 1998 e 2009, era concelleiro desde 2015. Os resultados municipais (PP 8, BNG 5, PSdeG 3 e ESCO 1), permitíronlle lograr un acordo de lexislatura co concelleiro de ESCO, Celso J. Rodríguez, que en 2019 concorrera pola formación Converxencia Galega.

Francisco Castro presenta o seu primeiro disco, 'Agora é o tempo', o 28 de outubro no teatro Salesianos (Vigo), facendo o seu debut como músico aos 57 anos.