A marcha do 16 de xuño en Marín e Pontevedra rexeita as celulosas de Lourizán e da Ulloa

A tradicional 'marcha contra a celulosa" en Lourizán (Pontevedra) que a Asociación pola Defensa da Ría leva anos impulsando ten este ano a súa cita o domingo 16 de xuño, con saída ás 12 horas das alamedas de Marín e Pontevedra. Este ano o lema da mobilización é o de Nin Ence na ría nin Altri na Ulloa, unindo así dúas mobilizacións sociais contra as celulosas. "Hoxe a Xunta da Galiza apoia submisamente a absurda e ilegal permanencia de Ence na ría, e mesmo auspicia a ampliación das súas instalacións, o aumento da produción, do consumo de auga e materias primas", afirman as convocantes. Ao tempo, engaden, a Xunta "apoia e promove tamén o proxecto de celulosa que a portuguesa Altri quere instalar en Palas de Rei", que terá, advirten, graves consecuencias na comarca.