O Bloque Nacionalista Galego (BNG) pide "ambición" na comisión do Parlamento galego sobre financiamento para que "a Galiza non quede atrás e teña un sistema xusto".
Nun comunicado, o Bloque insiste en requirir unha negociación bilateral Galiza-Estado fronte unha multilateralidade que propón a Xunta e que "fixo perder xa 14.000 millóns".
A responsable de Facenda e Función Pública, Noa Presas, valora que haxa consenso para reactivar esta comisión parlamentaria encargada de facer unha proposta de reforma do sistema de financiamento.
Porén a nacionalista empraza a que "se elaboren canto antes unhas conclusións que tiñan que aprobarse en 2022".
Censura que o PP tivese "dous anos e medio bloqueada" esta comisión, "máis pendentes de servir a Xénova que aos galegos e galegas".
"Canto máis tempo perdemos, perdemos cartos para poder financiar cuestións tan importantes para a vida dos galegos e galegas como a sanidade ou o ensino", razoa.