Nena Daconte, Shego, Morreo ou Raúl están entre as novas incorporacións ao festival Atlantic Pride, que se celebrará na Coruña no mes de xullo. Nena Daconte presentará en directo o seu último disco, Casi Perfecto e recuperará o seu pasado máis pop-rock con cancións sobre o amor, o desamor, a soidade e o paso do tempo o 12 de xullo.
Ademais, Selena Leo, Eris MacKenzie e Filloas súmanse ao cartel da quinta edición, segundo informaron na presentación da nova edición deste festival a alcaldesa da Coruña, Inés Rei, e os directores do Atlantic Pride, Iván Cervo, César Pérez e Luís Pazos.
As novas incorporacións súmanse a artistas galegas xa anunciadas como Mondra, Sila Lua, O Rabelo e Nenaza, Catuxa Salom, Lontreira e Amoebo
Entre o 7 e o 14 de xullo, A Coruña volverá ser a sede do "Orgullo do Norte" para celebrar esta nova edición na que se propoñen oito días de música e festa arredor da diversidade sexual-afectiva.
O festival está promovido pola Asociación Orgullo Coruña e o Concello da Coruña, co apoio da Deputación da Coruña e o patrocinio de empresas.
Como novidade este ano, nacen as ''Afertparties do Atlantic Pride' para que o público poida continuar a festa en lugares seleccionados da cidade ao rematar os concertos ao aire libre.
