A novena edición do Festival de Curtas de Verín explora as fronteiras mentais

Traballar desde o cinema para concienciar o público sobre os temas que definen a sociedade contemporánea. Eis o obxectivo que se marca o Festival Internacional de Curtas Vía XIV de Verín (FIC), que se celebra a partir de mañá, 29 de agosto, e até o vindeiro 8 de setembro. Pór en marcha un evento destas características nun territorio afastado do circuíto de festivais, no interior da Galiza, supón un verdadeiro reto, que se traduce no gratificante froito de contribuír á dinamización cultural dun espazo xeográfico marcado por unha forte impronta rural. Tres seccións oficiais A estrutura das seccións oficiais do festival mantense como todos os anos: tres seccións que inciden en universos temáticos diferentes, aínda que conectados por un leit motiv común, que este ano vén definido como as fronteiras mentais. 'A raia' acolle curtas da Galiza e de Portugal e, este ano, presenta curtas como Ningún Deus, de Mirian Opazo, unha reflexión dos vínculos entre o rito máxico e a construción da identidade e a memoria colectiva do pobo, precisamente, a través da construción dunha máscara de peliqueiro; Illa Cordura, de Mario Fernández Filloy, un relato sobre a soidade dun fareiro; ou Lavadoiro, de Lois Patiño e Ana Amado, unha reflexión sobre o patrimonio material e inmaterial dos lavadoiros como espazos ligados ao traballo doméstico e de relación exclusivos das mulleres. Ademais, poderán verse nesta sección De(s)amor, da cineasta de Pontevedra afincada en Madrid Alba Pino, e varias mostras do cinema portugués, como A rapariga de olhos grandes e o rapaz de pernas cumpridas, de Maria Hespanhol, Natureza humana, de Mónica Lima, ou 2720, de Basil da Cunha, cineasta suízo de orixe portuguesa. 'Horizontes' xira sobre a idea do horizonte como liña imaxinaria e inalcanzábel e nela poderán verse filmes que abordan temas como o racismo e as microagresións que sofren as mulleres (Donkeyland, de Bahar Pars, Suecia), o papel da tecnoloxía na vida das persoas (Buffering... Please Wait, de Samantha Cherly Lai, Taiwán-Canadá), as doenzas mentais (Alegre y Olé, de Clara Santaolaya, España), o duelo e o sentimento de perda (Hipocampo, de Fernando Perez, España) ou as trampas da identidade (Deliver Me, do cineasta libanés - chinés Joecar Hanna-Zhang). Finalmente, 'Nova' está dedicada a obras que non se rexen por formatos industriais convencionais. Nesta sección destacan A short film about kids, no que o palestino Ibrahim Handal relata a primeira visita ao mar de catro nenos dun campo de persoas refuxiadas en Belén; Agnus Day, do italiano Giuseppe Isoni, na que se reflexiona sobre a idea de éxito que espallan as redes sociais; Nada de todo esto, unha coprodución arxentino-española, dirixida por Francisco Cantón e Patricio Martínez, que trata o tema do desclasamento; ou Lemon Tree, na que a estadounidense Rachel Walden revisa a visión habitual das relacións familiares. 50 anos da Revolución dos Caraveis A vontade de reflexión sobre a sociedade reflíctese no foco posto este ano nun dos fitos que contribuíron ao cambio de pensamento da sociedade portuguesa: a Revolución dos Caraveis. Farao lembrando o discurso do xeneral Humberto Delgado, no que pronunciou a súa famosa frase: "Estou pronto para morrer pola liberdade". O actor chavesense Rubén Sevivas presentará a súa curtametraxe Direito a Memoria. Nela, achégase a un dos discursos máis descoñecidos contra a ditadura en Portugal, que foi pronunciado perto de Verín, na veciña localidade de Chaves. No filme, Rubén Sevivas narra a historia do Xeneral Sen Medo (Humberto Delgado), que se opuxo ao réxime de Salazar e acabou sendo asasinado a mans da policía portuguesa en territorio español. O policía en cuestión foi Rosa Casaco, figura protagonista da segunda proxección, O Casaco Rosa, dirixida por Mónica Santos. O cinema de prestixio volve ás pantallas do FICBUEU en setembro Para e desde a veciñanza 'Verín no foco: día de feira' é o nome que engloba unha xornada na que o equipo do Festival de Verín se porá detrás das cámaras para gravar unha curta que se interne nas historias de vida das tendeiras da vila. A peza que resulte desta xornada poderá visualizarse a través das redes sociais do FIC. Ademais, o día 31 de agosto terá lugar a gravación en directo dun episodio do podcast As Bichas, un episodio no que se falará de como o xénero e a clase social atravesan a cultura e tamén sobre como moitos produtos audiovisuais nos posibilitan ampliar os nosos lindes mentais. Coa colaboración especial de Mariana Carballal. O FIC continúa así achegando a creación á veciñanza para que o audiovisual non se vexa como algo afastado do noso día a día, senón "como unha ferramenta a través da que narrar as nosas propias historias". Outros espazos Un capítulo especial do programa vén dado pola homenaxe ao desaparecido Cineclube Nosferatu, dirixido por Daniel Dapía e Manuel Ayán, que destacaba pola súa singularidade e ambición. Entre 2006 e 2013, o Nosferatu ocupou o antigo cine Buenos Aires de Verín, ao peche desta sala comercial. Os promotores do antigo cineclube inaugurarán o novo 'Espazo Nosferatu', coa programación de dúas curtametraxes clave na historia do cinema: Tomamos o Ferry (Carl Theodor Dreyer, 1948) e Arrière- saison (Dimitri Kirsanoff, 1950). A proxección de Nena, a estrea como guionista e codirector de Xosé A. Touriñán; as películas que traerá o festival invitado -este ano a Mostra Internacional de Cinema Etnográfico de Santiago de Compostela-; a colaboración co actor local Rubén Riós nun work in progress dun proxecto cinematográfico que se interna na situación que viven as mulleres que padeceron violencia de xénero dun e do outro lado da Raia; a sección dedicada a curtas realizadas por artistas locais e proxectos vinculados coa contorna; ou as actuacións escénicas e musicais -un monólogo de Touriñán, un espectáculo de narración oral de Raquel Queizás, concertos de Sophie Simonds ou Kediran...- completarán o programa do festival. O OUFF recupera a "obra mestra non recoñecida" de Carlos Velo