Como cada sábado, Nós Diario trae entre as súas páxinas un novo número do semanario Sermos Galiza. O semanario protagonízao, desta volta, a cineasta Ángeles Huerta, que é entrevistada por Irene Pin após estrear o pasado mes o filme O corpo aberto, obra baseada nun relato de Xosé Luís Méndez Ferrín.
"Miguel é un personaxe que observa, pola regaña da porta, a través da fiestra da escola... Coma nós, que estamos sentados na nosa butaca. E pode parecer pasivo, pero é o protagonista absoluto da película porque é o que encarna esa transformación tan brutal, o que realiza esa viaxe tan perigosa e tan real ao mundo das tebras, por dicilo dalgunha maneira", sinala nesta conversa que se publica o sábado.
Recuperando o Samaín
Xa é tempo de Samaín e Mar Álvarez achéganos ás súas orixes e vixencia da celebración na actualidade a través da reportaxe Samaín: recuperar a tradición. Unha tradición que, precisa a xornalista, nos anos 90 "seguía viva, aínda que adormecida, na cultura popular, mais non tiña un nome que a definira e axudara a preservala".
A época do Samaín, e en xeral o outono, conta cunha gastronomía propia. O costume de baleirar as cabazas para introducir unha vela dentro propicia que este produto se converta no alimento central da festa do Samaín. Con ela elabóranse diversas preparacións, como o cabelo de anxo ou a sobremesa máis típica destas datas: as chulas de cabaza; que comparten protagonismo nesta época coas castañas.
A historia agochada en Vigo
A segunda reportaxe deste Sermos asínaa Xosé Barros, que analiza o impacto das obras executadas polo Concello de Vigo na rúa Elduayen, "onde o pasado da cidade olívica teima en agromar", sinala o xornalista nesta peza titulada Os restos de Elduayen. A historia baixo os pés de Vigo.
Cando os equipos de construción contratados polo Goberno local comezaron a levantar o solo, os primeiros restos arqueolóxicos non tardaron moito en aparecer. Muros de vivendas, cimentos de edificacións antigas e o trazado das anteriores rúas que percorrían Vigo forman parte do xacemento que hoxe está ao descuberto en Elduayen. Unha oportunidade única e privilexiada para estudar o pasado da cidade que, porén, está a espertar o conflito entre o Concello de Vigo, co seu alcalde Abel Caballero á cabeza, a veciñanza e as asociacións que pulan pola protección do patrimonio cultural.
Música, arte e lecer
O apartado musical corre a conta de Olga Brañas, que trae as últimas novidades, a comezar por Un mapa, de Belém Tajes, mentres Fernando Montenegro asina o artigo titulado O paradoxo da perfección, dedicado a Glenn Gould.
Como vén sendo habitual, o experto en cinema Andrés Castro analiza os filmes máis destacados, entre eles Arxentina, 1985, de Santiago Miltre, mentres Pepe Barro tráenos na sección de Deseño o 'frescor do mar na boca' do dentífrico Tambo.
Noutra orde, Tensi Xesteira analiza na sección de Libros a obra Até aquí podo contar, deJosé Manuel Dopazo Entenza (Ed. Chan da Pólvora), así como outras novidades literarias, mentresManuel Barreiro fala de Black is Beltza. Ainhoa, deFermin Muguruza(Demo Editorial). Aliás, o colectivo Xealévanos a facer un percorrido polo monte do Grove.
Por último, as dúas páxinas de pasatempos corren a conta deXerardo R. RocaeXoán Costa.
*Lembra que podes atopar oSermos Galizaeste sábado acompañando o xornalNós Diario&64 páxinas por tres euros!
