Este encontro, organizado por Yolanda Castaño e promovido polo Concello de Pontevedra, achegará á cidade do Lérez poetas de interese de todo o mundo. Desde o arxentino Andrés Neuman, até a polaca Grażyna Wojcieszko, a catalana Mireia Calafell, o vasco Bernardo Atxaga, o portugués João Luís Barreto Guimarães ou o islandés Sjón, tamén coñecido polas súas colaboracións coa cantante Bjork.
A presenza galega en Pontepoética 7 é tamén destacada, con Antón Lopo, Ana Romaní, Berta Dávila e Cesáreo Sánchez.
Desde a sexta feira 7 até o domingo 9 de abril haberá encontros poéticos con escolas, recitais nas ruínas de San Domingos e no Teatro Principal, espectáculos poéticos en pubs e obradoiros de narrativa e poesía.