Atlético Guardés e Balonmán O Porriño comezan nova tempada na Liga Guerreiras

A elite do balonmán feminino galego volve ás canchas esta fin de semana. Comeza a Liga Guerreiras e nela estarán presentes, unha tempada máis, o Atlético Guardés e o Balonmán O Porriño. A competición comezará esta sexta feira en Atarrabia (Nafarroa) co partido entre as locais, o Beti-Onak, e as actuais campioas do Bera Bera. A estrea galega será o sábado entre O Porriño e o Zuazo (Polideportivo municipal, 19 horas). Pola contra, o Guardés será quen feche a primeira xornada xogando ese mesmo día contra o Xixón (A Sangriña, 20 horas). O Porriño olla a Europa Para BM O Porriño esta tempada será especial. Ademais de loitar polo título na máxima categoría estatal, as xogadoras de Ismael Martínez vivirán o seu ansiado debut na Copa de Europa. O adestrador, en declaracións a Nós Diario, recoñece que a pretempada foi "moi curta" ao comezar "máis tarde que as demais". Porén, xa era "algo asumido" e aproveitarán o descanso que haberá despois desta primeira xornada para "continuar dalgunha maneira a pretempada". En relación ao partido contra o Zuazo, o obxectivo é "sacar adiante este partido como sexa", mais con sensacións boas de cara ao novo curso. "Temos que ser optimistas e agardamos comezar cunha vitoria", reitera o técnico porriñés. Un novo torneo de verán lembra o fundador do Balonmán O Porriño No que ten a ver coa disposición das xogadoras para o compromiso de mañá, apunta que a central Carolina Bono "chegou hai menos de sete días", polo que, se ben asegura que será "importante" para o equipo, non debutará mañá: "Temos que reservala, mellor non facer tolerías ante calquera risco de lesión". Ademais, a lumbalxia que padece Micaela Casasola, outra das indiscutíbeis, obrigouna a acurtar a súa preparación. Sobre o rival, Ismael Martínez confesa que "non é un equipo fácil e, malia ser un dos recentemente ascendidos, ten moi claro o seu modelo de xogo, que é moi vertical". Por este motivo, afrontarán o choque "con moita cautela" e tratando de ser "moi eficaces a nivel defensivo". O Porriño cae nos cuartos de final da Copa da Raíña de Balonmán O adestrador non esquece a particularidade desta tempada na vila do Louro e ten claro que estar en Europa "en si xa é unha festa". O sorteo deparoulle o Brixen Südtirol como primeiro rival e o choque está programado para a fin de semana do 5 e o 6 de outubro en Bresanona (Italia), mentres que a volta será no Municipal o 12 ou o 13 do mesmo mes. "Non fomos conscientes até que vimos todo o que move estar nesa competición, este paso servirá para que o equipo medre", conclúe. As "boas sensacións" do Atlético Guardés O Atlético Guardés inicia unha nova tempada coa continuidade da súa adestradora, Ana Seabra, tras os profundos cambios que viviu hai uns meses. A portuguesa colleu o equipo logo da destitución de Cristina Cabeza o pasado maio e o experimentado co despedimento de Abel González. Ante o compromiso deste sábado ten claro que "vai ser diferente aos que tivemos na pretempada". Recoñece que ela e as súas xogadoras teñen "moitas ganas de comezar a liga despois de traballar moito" este verán. Aínda que ten un cadro de xogadoras "curto", as sensacións que lle deron estas semanas "non son malas", polo que a idea é "continuar" na mesma liña. En relación ao rival, Seabra advirte de que non será fácil. Para obter a vitoria cre que o seu equipo ten que estar "moi concentrado" traballando neste caso "a efectividade xeral", o que será "unha parte moi importante para termos éxito". Atlético Guardés e Elxe coliden por un posto na final da Liga Guerreiras Para o inicio da tempada, desde o Guardés informan que serán baixa María, por unha forte lesión nunha man, e Blazca Hauptman, que segue con molestias no xeonllo. Ademais, están convocadas para o primeiro partido, mais esta quinta feira padecían un forte proceso gripal, Estela e Cristina. Como novidades na convocatoria das guardesas, Ana Seabra chamou desta vez dúas xogadoras de categorías inferiores: Ángela Portela e a porteira Yanet Rodríguez. Supercopa da Galiza 2024 Guardés e O Porriño coñécense ben desde hai anos e saben das súas fraquezas e fortalezas. Sen ir moi lonxe, tiveron oportunidade de fechar esta pretempada xogando entre elas, o pasado domingo, na final da Supercopa Galiza 2024 na Sangriña, no concello da Guarda (Baixo Miño). O Atlético Guardés aproveitou o factor campo ante as porriñesas nun encontro que foi un espectáculo de alternancias, con ambos os equipos mostrando un alto nivel tanto en ataque como en defensa, e que rematou cun 29-26. O Porriño mostrou as súas credenciais, entre elas a grande efectividade en ataque e unha defensa moi ben armada, liderada pola porteira Ayelén Rosalez e as xogadoras Malena Valles, Paulina P. Buforn e Aitana Santomé. Cristina Cabeza non estará á fronte do Atlético Guardés na Copa da Raíña A clave desta proba para as do Baixo Miño radicou en comprobar que manteñen unha contundente defensa disposta a todo. Nela destacan, como nomes propios, os de María Palomo e Elena Martínez ademais de África Sempere. En ataque, as xogadoras fundamentais de Seabra foron Pauli Fernández, Cecilia Cacheda e Itziar Martínez.