O Banco de España actualizou o balanzo do custo do resgate público á banca e dá por perdidos máis de 40.000 millóns de euros, unha cifra que extrae após actualizar os datos do diñeiro recuperado e do que é recuperábel. Desde maio de 2009, as axudas do Frob ascenderon a case 54.400 millóns de euros dirixidos a 14 entidades financeiras. Ao feche de 2016 recuperáranse 3.873 millóns. A esta cifra, o Banco de España engade outros 10.400 millóns que considera recuperábeis.
Fóra destes cálculos fican os máis de 40.000 millóns que se darían por perdidos, cantidade que en base a esta actualización do Banco de España non volverían ás arcas públicas.
Dos 3.875 millóns retornados até o de agora, 783 millóns proceden da venda de Novacaixagalicia, actual Abanca. As caixas galegas recibiran axudas e inxeccións de diñeiro por máis de 9.000 millóns de euros, se ben hai cálculos que elevan esa cifra mesmo por riba dos 10.000 millóns.
