A Galiza perdeu nun ano máis de 1.600 negocios que carecían de persoal asalariado

AGaliza rematou 2022 con 241.287 empresas. As cifras que vén de publicar o Instituto Galego de Estatística (IGE) para ese exercicio, última anualidade con datos, apuntan que 163.899 non contan con persoal asalariado. A este respecto, o IGE destaca que os cerres centráronse naquelas sociedades de menos de 10 persoas empregadas, que suman 232.025 unidades produtivas e representan 96,1% do conxunto do tecido empresarial galego. As microempresas, aquelas mercantís con menos de 10 traballadoras e traballadores, son ampla maioría no tecido empresarial da Galiza. Segundo o IGE, 163.899 carecen de persoal asalariado, o que representa 67,6% do total das compañías galegas, 43.129 rexistran entre unha e dúas traballadoras e traballadores, 17.585 entre tres e cinco e 7.412 entre seis e nove. O paro baixou en abril na Galiza a un ritmo máis lento que no Estado A peor parte nos fechamentos levárona aquelas compañías sen persoal por conta allea. Un total de 1.666 negocios sen persoal asalariado cesaron na súa actividade entre 2021 e 2022, sendo as únicas empresas que rexistraron un saldo neto negativo. Aliás, suman 3.261 unidades produtivas menos que no ano 2020, evidenciando que os fechamentos nesta faixa empresarial formalizados durante a pandemia tiñan un carácter estrutural. 2.988 autónomos menos A Galiza perdeu 2.988 traballadores e traballadoras por conta propia en 2022. Se á volta de 2021 o número de persoas inscritas no Réxime Especial de Traballadores Autónomos (RETA) da Seguridade Social ascendía a 209.208, un ano máis tarde a cifra ficaba reducida a 206.225. Ao tempo, a caída do emprego por conta propia formalizábase na Galiza nun contexto de alza no conxunto do Estado. A mortalidade empresarial concentrouse nese período no sector do comercio retallista e da hostalaría. Segundo os datos ofrecidos polo Directorio central de empresas (Dirce) do Instituto Nacional de Estatística (INE) para 2022, nese exercicio fecharon 671 negocios dedicados aos diferentes epígrafes do comercio retallista. Asemade, desde decembro de 2019, momento previo ao comezo da pandemia, até decembro de 2022, cesaron na actividade 2.566 estabelecementos comerciais A industria galega da conserva supón 88% da facturación do sector a nivel estatal As organizacións de comerciantes ou de traballadores e traballadoras por conta propia poñen nome aos sectores máis prexudicados. Así, a Unión Profesional de Traballadores Autónomos (UPTA) destaca o téxtil e o calzado como os máis desfavorecidos no período 2020-2023, sinalando que "as empresas fabricantes, principalmente españolas, venden os seus produtos practicamente ao mesmo prezo que para a venda en liña, e os pequenos comerciantes non poden competir co comercio por internet”. O comportamento foi, tamén, moi negativo no caso de restaurantes, casas de xantar, cafetarías e bares. Se no exercicio de 2021 dedicábanse a esta actividade na Galiza 11.665 estabelecementos sen persoal asalariado, esta cifra caeu en 2022 a 11.466, cunha especial incidencia no conxunto dos estabelecementos de bebidas. Neste punto, destaca a precariedade e o empobrecemento dos traballadores por conta propia, que nese ano declararon uns ingresos medios anuais de 10.300 euros fronte aos 21.600 dos asalariados. O saldo empresarial total para 2022 foi positivo polo comportamento da pequena, da mediana e da grande empresa. Nesta liña, a Galiza contaba nese ano con 40 unidades produtivas máis que en 2021; porén, o Consello Económico e Social da Galiza desvela no seu informe para esa anualidade que “a taxa de creación de empresas no ano 2022 descende lixeiramente até as 14,1 sociedades por cada 10.000 habitantes fronte ás 14,5 do ano anterior, situándose este indicador en 20,8 sociedades no conxunto do Estado”. O Consello Económico e Social da Galiza sinala que a “ralentización no ritmo de crecemento da actividade económica en 2022 tradúcese nunha caída interanual do número de empresas con traballadores inscritos na Seguridade Social na Galiza”. A este respecto significa que, “atendendo á evolución ao longo dos últimos anos, cómpre resaltar en primeiro lugar o descenso paulatino desde o ano 2010”, sendo na “Galiza o número de empresas inscritas inferior ao rexistrado en 2008 e 2019”. O declive da industria galega: menos empresas e menos emprego de calidade As pequenas empresas mercantís entre 10 e 49 traballadoras e traballadores son un grupo moi reducido no país. Pertencen a esta categoría 7.859 sociedades, cunha clara maioría das compañías incluídas na súa faixa baixa, rexistrándose entre 2021 e 2022 a apertura de 480 mercantís nesta fracción de persoal asalariado, que significa recuperar os niveis previos á pandemia, cando se contaban con 7.812 unidades produtivas. Un total de 1.328 compañías teñen a consideración de mediana empresa. Neste caso, 819 declaran un cadro de persoal de 50 a 99 persoas, 411 declaran un cadro de 100 a 254 traballadoras e traballadores e 98 de 249 a 499. Precisamente, nesta faixa de persoas asalariadas apraceron 68 novas compañías, unha cifra análoga á dos momentos anteriores á etapa da Covid. A grande empresa A grande empresa, compañías con máis de 500 traballadoras e traballadores, é unha excepción na Galiza. Segundo o Instituto Galego de Estatística, teñen esta consideración 75 sociedades, significando só 0,02 do tecido empresarial e sumando este grupo seis compañía máis que no exercicio de 2021.