A Fiscalía española pide perseguir a Puigdemont co Executivo estatal nas mans de Junts

A Fiscalía do Estado español reclamou a segunda feira ao instrutor da causa contra os líderes independentistas cataláns que desenvolveron un referendo de independencia en outubro de 2017, Pablo Llarena, a reactivación das ordes de detención internacionais e no marco da normativa da Unión Europea contra o ex presidente de Catalunya Carles Puigdemont e o seu ex conselleiro Toni Comín, aos que acusa de malversación de fondos públicos e desobediencia, após a negativa da Xustiza de Alemaña, Italia e Bélxica a aceptar a súa extradición baixo a acusación orixinal, que incluía o delito de rebelión. Amais de Puigdemont, que liderou até 2022 Junts, cando cedeu a Presidencia da formación a Laura Borràs, Comín tamén foi elixido eurodeputado en 2019 pola lista da formación, o mesmo que aconteceu coa ex conselleira Clara Ponsatí, que foi detida en Barcelona por orde de Llarena, que a inculpa dun delito de desobediencia e demanda a súa declaración. Así e todo, Ponsatí negouse a ofrecer o seu testemuño diante do xuíz de garda en Barcelona, e foi liberada unha vez que lle comunicaron que está a ser procesada, após reiterar o seu rexeitamento a acudir ao Tribunal Supremo español a declarar. Todo isto apenas un día despois das eleccións estatais, que outorgaron a Junts unha posición determinante na conformación dun novo Goberno español, até o punto de que o seu apoio -na forma dunha abstención en base aos resultados provisionais, á espera do voto de fóra do Estado- é imprescindíbel para que Pedro Sánchez, do PSOE, poida seguir encabezando o Executivo unha lexislatura máis. O propio Puigdemont fixo referencia a esta situación, subliñando que “un día es decisivo para formar un Goberno español, ao día seguinte España ordena o teu arresto”. Se a forza soberanista catalá opta por bloquear a configuración do Gabinete, ábrese un prazo de dous meses desde a primeira investidura sen éxito para que algún candidato a presidente obteña cando menos máis votos a favor que en contra, pasado este tempo disolveríase o lexislativo e ficarían convocadas novas eleccións, que poderían decorrer ao final deste ano. Máis alá da coalición de Goberno do último mandato, con Sumar substituíndo Unidas Podemos (UP), Sánchez tería que pactar un acordo de investidura con Esquerra Republicana de Catalunya (ERC), EH Bildu, Partido Nacionalista Vasco (PNV) e Bloque Nacionalista Galego (BNG) como o de finais de 2019. Aínda que as dúas primeiras formacións se abstiveron cun pacto co PSOE polo medio nesa ocasión, asinaron distintos acordos ao longo da lexislatura, ao que hai que engadir a alarma compartida entre estas forzas soberanistas pola posibilidade da chegada da extrema dereita de Vox ao Goberno estatal aliado co Partido Popular (PP). Marta Vilalta, secretaria xeral adxunta e voceira de ERC, culpou a Fiscalía por tratar de “influír” na “dixestión” dos resultados electorais e nas negociacións para a investidura de Sánchez. Ao tempo, pediu a Junts negociar conxuntamente para aceptar a investidura do candidato do PSOE defendendo “os intereses de Catalunya”. As condicións detalladas por ERC para aceptar que Sánchez manteña o cargo son o traspaso da xestión da rede ferroviaria de proximidade, avanzar na mesa de negociación bilateral cara a un referendo de autodeterminación e acabar co déficit fiscal. Asemade, a Assemblea Nacional Catalana demandou ás formacións soberanistas "confrontar co Estado, debilitalo a través do bloqueo e manterse firmes até lograr a independencia". No que atinxe a Junts, Borràs salientou que non investirán “ningún presidente do Estado español que non aborde a solución do conflito político con Catalunya, e iso pasa por abordar a amnistía e a autodeterminación”. Apuntando que “é difícil superar o Goberno que se chamou o máis progresista da historia, con espías patrióticos, policía patriótica e unha cúpula xudicial defendendo a unidade de España case por riba dos principios básicos da Xustiza”, a líder de Junts trasladou a responsabilidade dunha repetición electoral á Sánchez, “que terá o problema catalán na súa mesa”, e retrucou as mensaxes do mandatario español na campaña electoral, nas que considerou a Puigdemont unha “anécdota”, resolvendo que “veremos se saberán facer da anécdota categoría”. O PSOE non ten présa pola investidura Porén, a Executiva do PSOE subliñou a medios estatais que a amnistía ás persoas condenadas pola organización do referendo en Catalunya ou un plebiscito de independencia son extremos “infranqueábeis”. Na súa reunión da segunda feira, Sánchez reiterou que “esta democracia atopará a fórmula da gobernabilidade”, intentando desbotar unha hipotética repetición dos comicios. Á vez, reclamou que “a xente descanse e que goce das vacacións”, antes de abordar as negociacións e acordos que precisa para intentar ser investido novamente como presidente. Fontes da formación transmiten que o candidato do PP, Alberto Núñez Feixoo, non chegará a presentarse a unha investidura para a que non conta con apoios dabondo. Sumar quere acelerar as negociacións para gobernar Á mensaxe de calma do PSOE contestou Sumar instándoo a negociar á maior brevidade posíbel un futuro Executivo de coalición, facendo fincapé en que precisan do apoio doutras formacións, en referencia ás forzas soberanistas. A candidatura de coalición designou ademais a Jaume Asens, que se desempeñaba como presidente do grupo de UP no Congreso, para encabezar as conversas con Puigdemont pola boa relación entre eles. Sumar quere “coñecer as posicións de saída das formacións catalás e explorar todas as vías de acordo”, sinalou á prensa catalá, que recalca que os primeiros contactos con Junts xa se terían producido. Feixoo busca a investidura O líder do PP defendeu na xuntanza coa dirección da formación que “desde a mañá de hoxe [pola segunda feira] mantiven contactos con distintas forzas políticas co fin de conseguir un Goberno estábel en España”, citando Unión do Pobo Navarro (UPN), Vox, PNV e Coalición Canaria. Aínda así, admitiu que “non alcanzamos todas as nosas expectativas”, unha vez que só UPN lle ofreceu o seu apoio. En todo caso, destacou que “non vou renunciar a intentalo” e afirmou que “se Sánchez non acepta un diálogo co PP exploraremos todas as vías para formar Goberno”.