A presidenta da Comunidade de Madrid, Isabel Díaz Ayuso, rexeitou o vídeo difundido en redes sociais polo ministro de Exteriores israelí, Israel Katz, con imaxes de dous bailadores de flamenco intercaladas con ataques de Hamás, mais apuntou a que o Goberno español lanza "ofensas constantes" e "está a chamar ao exterminio" de Israel.
Nunha entrevista esta segunda feira en Telecinco, Díaz Ayuso indicou que, até ese mesmo momento, non vira o vídeo senón que oíra falar del pola radio. En todo caso, mostrouse en contra de "calquera cousa que poida estereotipar a España".
"Non me apetece ver unha cousa así. Dóeme na alma, evidentemente, mais están a chamar ao exterminio de Israel e están a xustificar o que o terrorismo de Hamás pretende con este Estado", sinalou. Díaz Ayuso sostivo que "as ofensas continuas contra Israel por parte do Goberno [español] están a ser constantes".
Neste punto, sostivo que cando a vicepresidenta segunda do Goberno español, Yolanda Díaz, chamou "ao exterminio desde o río até o mar, desde o río Xordán até o Mediterráneo, dun Estado" non cre que este Estado "responda con flores".
"Isto está a provocalo o Goberno constantemente porque necesita quedarse coa extrema esquerda do seu Goberno, e tamén facer política internacional fóra das fronteiras para gañarse fóra o prestixio que non ten en España", remachou.
Ameazas de Israel
Precisamente esta segunda feira, o Goberno de Israel ameazou con "facer dano aos que lle fagan dano" e recalcou que "os tempos da Inquisición terminaron", á vez que detallou que a orde prohibindo ao Consulado do Estado español en Xerusalén dar servizo á poboación palestina entrará en vigor o 1 de xuño, no marco da resposta israelí á decisión de recoñecer o Estado de Palestina.
"Os días da Inquisición terminaron. Hoxe en día, o pobo xudeu ten un Estado soberano e independente, e ninguén nos obrigará a converter a nosa relixión nin ameazará a nosa existencia: a aqueles que nos fan dano, nós farémoslles dano en resposta", dixo o ministro de Exteriores israelí, Israel Katz.
