Claudia Sheinbaum, favorita para gañar a Presidencia de México

Mañá en México 97 millóns de persoas están convocadas a renovar 20.375 cargos federais, incluídos nove Gobernos rexionais, as Alcaldías do país, 500 escanos da Cámara de Deputados e 128 do Senado, así como a Presidencia da República, á que concorren dúas candidatas e un candidato, en representación das coalicións Sigamos facendo historia, Forza e corazón por México e do Movemento cidadán. Sigamos facendo historia, unha agrupación de carácter patriótico e antiimperialista, parte como principal favorita para gañar estes comicios. A coalición está conformada polo nacionalista Movemento de Renovación Nacional (Morena), formación do actual presidente do país Andrés Manuel López Obrador, popularmente coñecido como AMLO; polo marxista Partido do Traballo e Os Verdes. A súa candidata é Claudia Sheinbaum, unha veterana militante progresista desde a etapa universitaria, fundadora de Partido da Revolución Democrática (PRD) e de Morena, próxima a AMLO e xefa do Goberno da Cidade de México entre 2018 e 2023. México, en campaña para elixir a sucesora de López Obrador Sheinbaum aparece destacada en todas as enquisas, que a sitúan por encima de 54% dos sufraxios e cunha diferenza de máis de 20 puntos sobre a súa principal competidora, a globalista, Xóchitl Gálvez. Neste sentido, as cinco últimas sondaxes coñecidas na terza feira outórganlle entre 58,8% e 54% do sufraxios. Estes mesmos estudos adxudican a Gálvez entre 34% e 29,8% dos sufraxios, se ben apuntan a unha elevada indecisión no seu electorado. Por último, as sondaxes sitúan ao terceiro candidato en discordia, Jorge Álvarez Máynez, entre o 19% e o 9,4%, moi lonxe das súas competidoras. A alternativa globalista Gálvez non respondeu as expectativas abertas ao comezo deste longa campaña electoral iniciada o pasado 1 de marzo. Antigo cargo gobernamental do Goberno de Vicente Fox e afiliada do Partido de Acción Nacional (PAN), é candidata de Forza e corazón por México, un conglomerado electoral articulado polas tres formacións tradicionais da política mexicana, o demócrata-cristián PAN, o neoliberal Partido Revolucionario Institucional (PRI) e o noutrora antiimperialista e actualmente socioliberal Partido da Revolución Democrática (PRD). Neste caso, a coalición liderada por Gálvez preséntase cun programa electoral de carácter globalista e neoliberal. Movemento Cidadán é o terceiro actor político neste proceso electoral. A formación sitúase no espazo do socioliberalismo, cunha proposta reformista no ámbito dos dereitos civís e unha axenda neoliberal no terreo económico. Malia que o seu candidato, Jorge Álvarez Máynez, aspiraba a concentrar o voto de protesta contra estes seis anos de Goberno de AMLO, a campaña fíxoselle demasiado longa, ficando a súa intención de voto moi lonxe das súas expectativas iniciais. Neste contexto, explícanse os chamados dos últimos días de Gálvez ao seu electorado para concentrar os sufraxios. Sheinbaum vs Gálvez: dúas mulleres disputarán por primeira vez a Presidencia de México A sombra de Andrés Manuel López Obrador pairou sobre todo o proceso electoral. Neste sentido, Sheinbaum fechou a súa campaña a pasada quinta feira sinalando: “Comprométome ante vostedes a gardar o legado do presidente Andrés Manuel López Obrador”. A este respecto, Sheinbaum cualificouno como “o mellor presidente da historia” e concluíu que “desde aquí dicímosche, querido presidente, é unha honra estar con Obrador”.Pola súa banda, Gálvez non aforrou críticas ao actual mandatario mexicano acusándoo de “entregar o país ao crime organizado” e culpándoo de “enfrontarse aos sectores que crean riqueza”. Os grandes logros de AMLO déronse na área económica. Segundo os datos achegados polo Instituto Nacional de Estatística e Xeografía (INEGI) de México e validados pola axencia estatística da Organización de Nacións Unidas (ONU), nove millóns de mexicanos saíron da situación de pobreza durante o seu mandato. A isto, contribuíu o incremento das pensións e o crecemento sostido dos salarios, que no sexenio melloraron o 3,3% respecto da inflación. Ao tempo, o Produto Interior Bruto medrou o 5,7% en 2022, o 3,9% en 2022 e o 3,2% en 2023. A cuestión económica A política económica de AMLO representou unha viraxe radical cos pasados Gobernos. Neste sentido, o Executivo nacionalista mantivo unha dura batalla contra o capital estranxeiro para recuperar para o Estado determinados sectores estratéxicos da economía, como o enerxético, que os mandatarios anteriores privatizaron en beneficio de multinacionais estadounidenses ou da Unión Europea. A este respecto, destacou a saída do país da empresa Iberdrola, que tras ser ameazada de nacionalización, vendeu ao Goberno mexicano os seus activos no país en 2023 por unha cantidade de 6.200 millóns de euros. Unha das principais críticas durante a campaña de Gálvez a Sheinbaum veu por esa fronte. A este respecto, o politólogo arxentino, Jorge Elbaum, sinalaba onte nun artigo no xornal de Bos Aires Pagina 12, que “os sectores conservadores están en guerra contra AMLO e contra Sheinbaum, e dita ofensiva ten socios exteriores. O principal reside en Estados Unidos, para quen o actual Goberno é un pesadelo porque rompeu os acordos que a narcooligarquía do PRI e o PAN estabeleceran coas multinacionais. Tres das dimensións a través das cales se institúe a inxerencia desde o norte son: o tráfico ilegal de armas, os procesos migratorios e o narcotráfico”. Sheinbaum e a consolidación do cambio en México Gálvez non aforrou, tampouco, críticas a Sheinbaum polas súas propostas en materia internacional e pola ideoloxía de Morena. Neste dirección, a candidata de Sigamos facendo historia retrucou que “o noso proxecto defende a democracia, as liberdades, a verdade e a dignidade das persoas. Dígoo porque os adversarios, a oposición e os seus intelectuais, expuxeron que nesta elección xógase a democracia ou o autoritarismo”. Na mesma liña, aseverou que “o que non entenden, e hai que insistir para que non haxa confusións, é que a democracia sempre foi a nosa bandeira e a nosa forma de actuar, e que o autoritarismo é precisamente a historia e a característica deles, do PRIAN. A defensa da democracia nunca foi unha reivindicación da dereita”. O novo Executivo mexicano ten por diante importantes retos para os próximos anos. Un deles está asociado á seguridade cidadá, nun país marcado pola violencia, que deixou durante o mandato de AMLO 186.000 homicidios violentos e provocou o asasinato de 34 candidatos durante a campaña. Precisamente, a loita contra o crime organizado foi unha das principais eivas do Goberno de Morena, que Sheinbaum e Gálvez prometeron corrixir durante a campaña. A herdanza internacional de Andrés Manuel López Obrador A política internacional de México está marcada por posuír miles de quilómetros de fronteira con Estados Unidos, porén, AMLO levou adiante unha política exterior independente, favorábel a un mundo multipolar e aliñada cos Gobernos progresistas do continente americano. Neste sentido, xogou un papel chave para salvar a vida de Evo Morales e Álvaro García Linera após o golpe de Estado en Bolivia de 2019 e rexeitou as políticas de bloqueo a países como Cuba e Venezuela. A este respecto, o mandatario mexicano tense convertido nunha referencia do polo progresista internacional, referendada nos últimos tempos co seu apoio a Palestina no conflito con Israel e a súa aposta, pola paz, o diálogo e unha saída negociada á guerra que libran Rusia e Ucraína co poio da OTAN no leste de Europa.