A ONU notificou a Israel a súa inclusión na lista de países que violan os dereitos dos nenos e nenas en conflitos armados, informou o portavoz da Secretaría Xeral, Stéphane Dujarric.
Esta lista, que inclúe por primeira vez Israel, adxúntase ao informe anual que elabora a oficina do secretario xeral, António Guterres, sobre a situación dos nenos e nenas en conflitos armados e debe presentarse ao Consello de Seguridade o próximo 14 de xuño, explicou o portavoz.
Segundo a práctica habitual, entregarase unha copia anticipada aos membros do Consello nesa data e o informe publicarase oficialmente o 18 de xuño.
Despois, será discutido polos membros do Consello de Seguridade nun debate aberto previsto para o 26 de xuño. Dujarric subliñou que a confección da lista é "unha iniciativa" encargada anualmente polos membros do Consello de Seguridade seguindo "unha metodoloxía común".
Nesta lista apareceron anteriormente Rusia, Afganistán, Iraq, Myanmar, Somalia, Iemen e Siria, así como organizacións como o Estado Islámico, Al Qaeda ou Boko Haram.
Israel responde que o seu exército "é o máis moral do mundo"
"O noso exército é o máis moral do mundo, quen entra na lista negra é o secretario xeral, que fomenta o terrorismo e o odio a Israel. O secretario xeral debería avergoñarse de si mesmo!", escribiu o embaixador de Israel ante a ONU, Gilad Erdan, nunha publicación na rede social X.
Na actual invasión e ofensiva sobre Gaza, o Exército de Israel asasinou máis de 19.000 nenos e nenas.
