O secretario xeral do PSdeG, José Ramón Gómez Besteiro, pediu o apoio para os socialistas nas eleccións europeas, os que "realmente cren en Europa" para "defender os intereses" da Galiza.
"Quen mellor que quen cre verdadeiramente en Europa para defender os intereses da Galiza en Europa? Só o PSOE. Os demais están involucrados en leas. Por unha banda, a dereita coa ultradereita; e, doutra banda, unha esquerda que aínda non sabe que estamos no ano 2024 e que estamos en plena eclosión e defensa da UE", incidiu Besteiro.
Así o sinalou este sábado antes de participar en Lalín na homenaxe aos 75 anos da empresa Embutidos Lalinense, onde estivo acompañado do eurodeputado socialista e candidato Nicolás González Casares.
Besteiro puxo a empresa do Deza como exemplo dunha "forma de ser, de entender a Galiza e de estar orgullosos da lingua galega", así como de lanzar os produtos desta comarca ao mundo etiquetados en galego.
“Europa dinamiza o rural”
Pola súa banda, o candidato socialista aos comicios europeos enxalzou a empresa como un "exemplo do resultado positivo" das políticas comunitarias. "Fronte as críticas, aquí temos a proba de que Europa dinamiza o rural e dos efectos de apoio ao tecido empresarial e da defensa da lingua e da cultura", remarcou.
Neste sentido, reiterou o compromiso do PSOE co apoio ás empresas galegas e subliñou a importancia das políticas que favorezan a transición ecolóxica e sostíbel, garantindo oportunidades para todos os sectores produtivos.
Logo de participar na homenaxe a Embutidos Lalinense, Besteiro e Casares visitaron Vilagarcía de Arousa (O Salnés), onde mantiveron un encontro coa militancia desta localidade e onde participaron no recoñecemento da militante local Loli Landeira. Neste acto participaron tamén o alcalde de Vilagarcía, Alberto Varela, ou o delegado do Estado español no Consorcio da Zona Franca de Vigo, David Regades.
