A cabeza de lista do BNG ao Parlamento Europeo, Ana Miranda, sinalou o candidato do PP, Arias Cañete, como “culpábel” do despece da frota cefalopodeira galega, a maioría da comarca do Morrazo, por tela deixado fóra o PP do acordo da UE con Mauritania. Nun mitin en Cangas xunto ao portavoz nacional, Xavier Vence, Miranda pediu á cidadanía que aproveite o 25 de maio para usar o voto e “mandar ao desguace a Arias Cañete e ao PP”.
Lembrou que Arias Cañete era ministro de Pesca cando se negociou en Bruxelas o acordo UE-Mauritania que deixou fóra aos barcos galegos: “Traizoou Galiza nesa negociación pesqueira, porque non moveu un dedo pola frota galega, como si fixo pola andaluza”, denunciou a nacionalista.
Miranda salientou que “Galiza é unha potencia pesqueira e ten que ser respectada, ten dereito a pescar e a poder producir”, por iso, denunciou as políticas da Unión Europea que incentivaron “o cese da actividade pesqueira e o desguace dos barcos”. “Esta Europa de mercaderes non quere que os barcos galegos vaian pescar, non quere que vaian ao mar, prefire que vaian á chatarra”, criticou. “Isto provoca paro, pobreza, emigración, miseria”, dixo a candidata do Bloque, que defendeu para o noso país “outras políticas” de “apoio aos sectores produtivos”.
"Galiza é unha potencia pesqueira e ten dereito a ser respectada, a pescar e poder producir", sinala a candidata do Bloque
Pola súa parte, a candidata de AGE, Lidia Senra, pediu unha Política Pesquera Común (PPC) que potencie a pesca artesán e o marisqueo, “garantindo ademáis un reparto xusto do dereito a pescar”. Nun acto de campaña en Ribeira, acompañada por Xosé Manuel Beiras e Yolanda Díaz, Senra demandou “unha política que impida que sigan ocupando o mar con recheos de cemento que destrúen o marisqueo”. Ademais, cargou contra o PP por “roubar o que non é seu”.
Compromiso
O candidato de Compromiso por Galicia ao Parlamento europeo, Paulo Carlos López, pola súa conta, esixiu durante un reparto informarivo en Ferrol que o Banco Europeo de Investimentos “non só faga demitir a Magdalena Álvarez senón que tamén se comprometa coa comarca de Ferrolterra, investindo para reactivar a súa economía e crear emprego”.
No PP, o seu secretario xeral en Lugo, Xosé Manuel Barreiro, pediu o voto para Arias Cañete, “que foi quen mellor defendeu a pesca galega”. Por último, o candidato galego do PSOE, José Blanco, acusou ao goberno de estar formado por “pirómanos vestidos de bombeiros”.