A I República galega foi lembrada onte, no seu 83º aniversario, nun xantar de confraternidade celebrado no restaurante A Nave de Vidán, en Compostela, no que participaron algo máis dun cento de persoas.
Durante toda a comida realizáronse numerosos brindes lembrando a república proclamada, en Ourense e Compostela, no ano 1931 por obreiros e activistas que loitaban contra a decisión do goberno republicano español de paralizar as obras do camiño de ferro en Galiza.
Ao final do xantar houbo, tamén, unha troca de ideas e opinións nun espazo de convivio entre todas as persoas participantes, no que se fixeron votos por unha pròxima República Galega.
