Non se sabe exactamente cantos nin quen son, mais si que eurodeputados españois manteñen un fondo de pensións en Luxemburgo cunha Sicav. Desvelouno esta terza feira Infolibre e xerou un ‘mini-terremoto’ político, con partidos e algúns dos implicados (e dos que si trascendeu o nome) a ter que dar explicacións. Non todos, outros seguiron desaparecidos.
O cabeza de lista do PP (Arias Cañete), do PSOE (Elena Valenciano) e de Izquierda Unida (Willy Meyer) foron 3 deses nomes que saíron á luz en Infolibre. Canalizaron as súas entregas “adicionais e voluntarias” para a súa xubilación a través dunha sociedade con moi baixa tributación e radicada nun dos estados máis ‘opacos’ da UE. A Eurocámara achegou un de cada dous euros que daban os subscriptores do fondo.
Nada máis saltar a nova, Willy Meyer anunciou que se daba de baixa dese fondo de pensións, no que levaba desde 2004, unha década, sinalando que até o día de hoxe descoñecía as condicións dese investimento.