Entre o 26 e 28 deste mes os e as concelleiras que facían parte da Xunta de goberno local do Concello de Ourense en 2008 terán de declarar como imputad@s no Xulgado nº2 da cidade das Burgas. O motivo da comparecencia radica no proceso de adxudicación dunha obra de actuación nunha céntrica rúa da cidade naquel entón.
Os membros desa xunta de goberno local terán que explicar ante o xuíz por que se seguiu o procedemento negociado e non se sacou a obra a concurso. Esta actuación foi adxudicada por algo menos de 60.000 euros. Naquela altura gobernaba o bipartito entre socialistas e nacionalistas. Entre as persoas imputadas por un posíbel delito de prevaricación están Francisco Rodríguez (ex-rexedor) e Agustín Fernández (actual alcalde socialista). Tamén están Marga Marín e Áurea Soto (concelleiras do PSOE), ben como o ex-concelleiro do BNG Andrés García. A denuncia por esta posíbel irregularidade foi presentada por Democracia Ourensana.
