Jorge Suárez, alcalde de Ferrol, considera que ningún dos rexedores da Marea deben ser candidatos á Xunta de Galiza. En declaracións á cadena Ser, o ferrolán amosou o seu convencemento de que estes alcaldes non deben deixar os seus postos, “por responsabilidade” e compromiso coa veciñanza que os elixiu. Así que non el propio, nin Martiño Noriega nin Xulio Ferreiro deberían encabezar a lista da Marea para tentar conquistar a Xunta. “Non deberiamos abandonar os nosos postos nas trincheiras”, dixo.
O dirixente de Esquerda Unida considera que os resultados obtidos por En Marea o 20-D non teñen “parangón” na historia “para un grupo que representa só os intereses dos galegos” e considera que nas eleccións galegas previstas para este ano eses resultados poden mesmo ser mellores. “Temos a posibilidade histórica de ter un presidente da Xunta xurdido dun movemento de unidade popular”.
