MAPA | Case sete de cada dez concellos carecen de matrona na Galiza, que está á cola do Estado neste servizo

A Atención Primaria galega conta con 171 prazas de matronas, o que representa unha das porcentaxes máis baixas do Estado español e do conxunto dos países da Organización para a Cooperación e o Desenvolvemento Económico (OCDE). Segundo as cifras que o Instituto Galego de Estatística (IGE) publicou neste mes, a Galiza dispuña en 2023 dunha ratio de 3,1 matronas de media por cada 10.000 mulleres de entre 14 e 64 anos, o que significa 1,1 menos de media que as cifras recollidas para o ano anterior pola Federación de Asociación de Matronas de España (FAME). A FAME, nun informe presentado en 2023 baixo o título de Desenvolvemento da profesión de matrona en España: retos e recomendacións, onde se recollían os datos referidos a 2022 -os últimos achegados polo Instituto Nacional de Estatística para o conxunto estatal-, situaba, un ano máis, Galiza á cola do Estado en número de prazas de matrona. A este respecto, sinalaba que o país dispuña unha media de 4,2 matronas por cada 10.000 mulleres entre 14 e 64 anos, 1,9 por baixo do dato estatal, presentando só uns rexistros peores Canarias e Asturias, con 3,3 e 3,7 profesionais -respectivamente- por cada por cada 10.000 mulleres entre 14 e 64 anos. Galiza á cola do Estado en cobertura de matronas Á cola dos países da OCDE O relatorio da FAME evidencia a fenda en número de matronas entre a Galiza e os Estados da OCDE. Mentres nestes últimos a media de profesionais por cada 10.000 mulleres entre 14 e 64 anos en 2022 era de 9,1, na Galiza era 4,9 inferior, ficando moi lonxe daqueles Estados onde o servizo de matronas estaba máis desenvolvido. O directivo da Asociación Galega de Matronas, David González, sinala a Nós Diario que o numero destas profesionais dispoñíbeis "hoxe é moi baixo porque as administracións fixeron un mal cálculo das necesidades de reposición en función das xubilacións previstas”. Neste sentido, explica que “varias das prazas que ten recoñecido o Sergas nos centros de saúde están vacantes durante todo o ano” e advirte da fuga de profesionais cara a outras comunidades do Estado porque “ofrecen máis estabilidade e calidade no emprego que a Galiza”. Os datos achegados polo IGE para 2023 indican que só 99 concellos galegos contan con servizo de matrona. Nesta dirección, o instituto público destaca que 214 municipios, un máis que en 2022, non teñen esta prestación, permanecendo vacantes durante todo o ano unha parte das prazas. Na mesma liña, unha porcentaxe significativa destas prazas son atendidas temporalmente, asumindo unha mesmo profesional a prestación do servizo en diversos concellos. Precisamente, esta situación é a máis habitual nos centros de saúde rurais, onde a asistencia adoita prestarse só durante unhas horas á semana. !function(){"use strict";window.addEventListener("message",(function(a){if(void 0!==a.data["datawrapper-height"]){var e=document.querySelectorAll("iframe");for(var t in a.data["datawrapper-height"])for(var r=0;r