Unha avaría en diálise no Álvaro Cunqueiro paraliza o servizo 2 días e obriga a derivar doentes á privada

O servizo de Diálise do Hospital Álvaro Cunqueiro estivo paralizado dous días por mor dunha avaría, unha situación que obrigou a derivar e trasladar os doentes a centros privados nunha situación que, para a CIG-Saúde, “non existen precedentes nos hospitais públicos que antes realizaban estes tratamentos na área de Vigo” e que fai saltar as alarmas “dado o pouco tempo que leva aberto o centro”.

A central sindical exixe maiores controis á empresa concesionaria, ademais da elaboración dun informe obxectivo e non “de parte” para dilucidar a responsabilidade de Veolia. A reiteración de incidencias, afirma, de distinto tipo no Hospital, xestionadas con “silencio e escurantismo” supón unha “situación de risco para os intereses sanitarios públicos” e “alimenta a sospeita sobre a falta de compromiso das concesionarias coa prestación dun servizo de calidade”.

Estas anomalías son para a central produto do modelo privatizador do PP e xeran “incertidume, preocupación e incomodidade” entre os usuarios e usuarias.