Que cadaquén saque as súas propias conclusións, o que é innegábel é que na localidade de Noia non se fala doutra cousa. As decoracións natalicias no concello noiés provocaron unha inmensidade de comentarios nas rúas e nas redes sociais por seren un tanto “curiosas”.
O comentario máis repetido é “parece que están drogados” e é que as expresións faciais das figuras efectivamente dan esa impresión.
Polo visto, as figuras natalicias de Noia veñen do País Valencià, en concreto das Fallas de València e, segundo puido saber Nós Diario, o Concello de Noia comprou ditas figuras polo que, se cadra, hai que se afacer a velas cada ano polo Nadal.
"Distinto"
José Pérez, concelleiro de Cultura na corporación noiesa, definiu a decoración como “atractiva e distinta”. “Falamos cuns ‘falleros’ de València e adquirimos as figuras”, apostilou o edil.
Aliás, segundo Pérez, o Concello irá comprando máis decoración do estilo durante os próximos tres anos, polo que moita veciñanza xa está á espera de coñecer como serán esas figuras nos vindeiros ciclos de Nadal.
Agora, queda por ver se esta “distinta” decoración natalicia proposta polo edil noiés terá un ‘efecto chamada’ que incremente o número de visitantes á pequena Compostela.
