Frear o espolio

As vindeiras eleccións galegas danse no contexto dun escoramento do Partido Popular cara á extrema dereita así coma na intensificación do seu discurso centralista e nacionalista español. En sintonía, a Xunta desenvolve un modelo de gobernanza orientado á mermar a nosa identidade nacional á vez que favorece o despoxo e a progresiva degradación das condicións materiais, económicas e sociais, acrecentando as relacións de subordinación ao Estado. O goberno do PP, amais de afortalar a descapitalización simbólica e material do noso país, ampara a fuxida de grande parte dos recursos xerados aquí por empresas que tributan e teñen a súa sede fóra de Galiza. Son múltiples os ámbitos de espolio que o noso país está a padecer e só as forzas políticas propias son quen de actuar sen a pexa das ataduras estatais. O patrimonio histórico artístico é un destes ámbitos. Desprotección, abandono e desinterese por conservar e valorar o noso pasado marcan a pauta dunha política de sometemento aos intereses empresariais e estatais. Parques eólicos e empresariais, plantacións ou estradas esfarelan de xeito irrecuperábel milenarios conxuntos arqueolóxicos, que expertos e científicos, no "Manifeso Acibal", teñen denunciado coma unha auténtica depredación. Tráfico, saqueo e apropiacións consentidas de bens e obras artísticas campan pola nosa xeografía sen que salten as alarmas das administracións públicas. Monumentos e edificacións civís e relixiosas esmorecen en grave situación de deterioro e que, coma ten advertido a Asociación para a defensa do Patrimonio Cultural Galego, pon en risco de desaparición numerosos monumentos senlleiros da nosa historia. Montes veciñais Os montes veciñais en man común, sinais tamén da nosa identidade e da valoración da terra, están baixo ameaza de privatización por mor das modificacións lexislativas do PP. Esta figura comunal ocupa a cuarta parte do noso territorio e son xestionados por 2.800 comunidades que abranguen arredor de 250.000 comuneiros. Para blindar os montes fronte á posibilidade de que empresas forestais e madereiras poidan facerse coa xestión dos mesmos, a Organización Galega de Comunidades de Montes presentou en 2022 unha iniciativa lexislativa popular para garantir a súa preservación e manter vivo o rural. Nesta proposta, pretendíase a declaración dos montes veciñais como figura de protección medio ambiental e cultural mantendo a xestión comunal dos mesmos; porén, a maioría absoluta do Partido Popular impediu a admisión a trámite e que se chegase a debater. O noso país é albo da cobiza da industria mineira e extractivista O noso país é albo da cobiza da industria mineira e extractivista non só pola riqueza e variedade de metais e minerais, senón pola submisión da Xunta aos seus intereses. De feito contamos con 326 explotacións activas, sen contar as relacionadas coa auga. Posuímos reservas de dez dos 30 minerais que a UE considera fundamentais e estratéxicos, ademais de terras raras. Por isto, as solicitudes de licenzas para novas explotacións son incesantes, moitas delas megaproxectos cun risco enorme de deterioro medioambiental irreversíbel e sen producir valor engadido para o noso país dado que a transformación faise fóra. Ademais, coma xa se ten evidenciado, o secretismo e as coercións adoitan acompañar tanto a tramitación como a execución destes proxectos para tentar anular a resistencia popular. A "Axenda de Impulso da Minaría Sostíbel da Galiza 2030", lanzada pola Xunta e cuxa denuncia foi recollida neste xornal, aposta por seguir co modelo. Temos máis de 187 parques eólicos con 4.000 muíños instalados que producen electricidade para abastecer cinco veces a nosa poboación. Aínda así, centos de novos proxectos seguen a súa tramitación malia invadir áreas protexidas e de enorme valor ecolóxico, costa incluída. Unha invasión facilitada mediante modificacións normativas para satisfacer os intereses das poderosas enerxéticas con sede fóra da Galiza. Aí temos a Lei de Acompañamento dos Orzamentos, na que o PP propón a declaración dos proxectos industriais eólicos de “interese público" para facer prevalecer esta actividade fronte outras fontes económicas estratéxicas ou preservación do medio ambiente. Os encoros inzan o noso territorio, baleirando auga nos veráns e agasallándose a Iberdrola, Naturgy e Endesa con prórrogas escandalosas. Exportamos un 66% máis de electricidade da que consumimos estragando paisaxe, biodiversidade e vida rural sen retorno social do beneficio. Urxe derrotar o PP e adoptar medidas encamiñadas a recuperar o control sobre os recursos propios en beneficio da maioría social, poñendo freo á política colonial de desposuimento e de desnacionalización da Xunta.