A lista de espera aumentou na sanidade pública galega en seis meses, tanto para operarse como para ver un especialista. O tempo medio de espera para unha intervención cirúrxica era ao feche de 2023 de 67,9 días —2 máis que en xuño dese ano— e para ter unha consulta externa de 73,4 —10 días mais que seis meses antes—. O Sergas vén de facer públicas as listas de agarda por áreas sanitarias.
257.308 persoas figuraban en lista de agarda estrutural hospitalaria na Galiza —a lista oficial, que non contempla as esperas "non estruturais", por exemplo, as persoas pendentes de cita ou asignación de data— a 31 de decembro de 2023, segundo os datos que vén de publicar o Sergas. Delas, 45.027 esperaban por unha cirurxía (case dúas mil menos que na anterior publicación, de xuño de 2023) e 212.282 por unha consulta (1.600 máis).
O tempo máximo de agarda na Galiza para ser operado está no servizo de Neuroloxía da área de Ourense-Verín-O Barco: 130 días, 47 máis que seis meses antes. O servizo que ten máis pacientes en espera para ser intervidos cirurxicamente é o de Oftalmoloxía da área da Coruña-Cee, con 3.815. En canto ás agardas para consultar cun especialista, en Rehabilitación da área de Ourense-Verín-O Barco teñen que esperar menos que 317 días. No que respecta a número de pacientes que están en situación de agarda para ser atendidos polo especialista, é Traumatoloxía da área de Santiago-Barbanza quen máis ten na Galiza: 11.266 persoas.
Os tempos medios de espera para operarse na Galiza aumentaron principalmente en especialidades como Uroloxía (de 59 días no primeiro semestre de 2023 a fechar o ano con 71, 12 máis), Cirurxía xeral e de dixestivo (+6, até 61 días), Xinecoloxía (+7, teñen que agardar para ser intervidas 51 días) ou Neurocirurxía (+6). De xuño a decembro de 2023 a agarda para ser atendido en especialidades como Cirurxía e dixestivo pasou de 37 a 61 días de media na Galiza (23 días máis), en Traumatoloxía de 61 a 75 días de agarda, en Uroloxía de 38 a 71 e en Xinecoloxía de 32 a 58.
Por áreas
Para operarse, a espera media na área da Coruña-Cee é de 81 días —a máis alta da Galiza— e hai 42.167 persoas nesa situación. Para unha consulta externa hai 37.503 persoas e o tempo de agarda medio é de 49,5.
En Santiago-Barbanza son 31.787 as persoas que esperan pola cita cun especialista e agardan de media 63,9 días —20 máis que 6 meses antes—. Para unha cirurxía hai pendentes 7.633 pacientes —69,1 días de agarda—.
Na área de Ferrol agardan para ser operadas 2.846 persoas (56,9 días de media; 8 máis que en xuño de 2023) e 11.534 por unha cita cun especialista (tempo medio de 56 días).
Por último, na área de Vigo hai 32.316 pacientes pendentes dunha cita (esperan de media 49,8 días) e 7.648 de operarse (64,4 días).
