—Sermos Galiza celebra hoxe en Santiago os seus 10 anos de vida. Vostede será o encargado de pór o ramo ao acto, que destacará desta década?
Ben, para “pór o ramo” tomo prestados os primeiros versos dun poema de Gusttavo (así, con -tt-) Lima titulado 10 anos. Non é a única canción con este título mais esta, fronte a outras que falan de nostalxia e de lembranzas perdidas, fala de futuro, de responsabilidade e valentía para enfrontar os acontecementos, da necesidade de non permitir que outros inventen por nós a nosa historia e, sobre todo, de algo moi acaido para o que é a historia de Sermos Galiza e que se recolle no verso: Tudo é nada sem você.
Quer dicer, este proxecto, e estes resultados, non serían posíbeis sen a participación de tantas e tantas persoas que conforman o que chamamos Comunidade Sermos.
A combinación de confianza e prudencia permítenos avaliar as posibilidades e a viabilidade do proxecto
—Sermos comezou sendo semanario en papel e diario dixital, pero xa se propuñan daquela dotar o país dun diario en papel en galego. Confiaba por entón que era posíbel e viábel?
A confianza, creo eu, é unha das virtudes do que antes denominei Comunidade Sermos. A outra é a prudencia. E a combinación das dúas permítenos avaliar as posibilidades e a viabilidade do proxecto.
A posta en marcha de Sermos Galiza en 2012 foi resultado dun longo proceso de diálogo levado a cabo durante o ano 2011 e que tiña por obxectivo explicar o proxecto e conseguir os 300.000 euros de capital social necesarios para a saída do número un de Sermos Galiza.
Cinco anos despois, concretamente o 24 de novembro de 2017, fixemos pública a intención de ofrecer máis contidos a través dun diario en papel. Aquela decisión estaba sustentada en dúas ideas base: un diario en papel é necesario e é posíbel.
Sobre a necesidade non había dúbidas, mais restaba ver se era posíbel. E para iso marcamos un obxectivo: é posíbel e viábel se conseguimos 3.000 asinantes que nos permitan manter o proxecto sen dependencias de ningún grupo económico. Fixemos máis de 50 actos de presentación e logramos o obxectivo.
—Cales foron as maiores dificultades ás que tiveron que facer fronte nestes 10 anos?
Foron moitas. E para todas tiñamos unha saída, que podía resultar ou non, mais non sería nunca improvisada. Mais houbo dúas que non tiñamos previsto. A primeira, a Covid-19, que aparece xusto no momento en que Nós Diario se pon en marcha e que nos obrigou a paralizar campañas de publicidade e, daquela, de expansión e consolidación.
A segunda, a posición do Goberno de Feixoo, expresada a través da Secretaría Xeral de Medios, de negación da nosa existencia. Fíxese que non falo de axudas económicas, ás que non cabe dúbida que temos dereito como os demais medios e na proporción que nos corresponda, non, falo de negar o dereito á existencia.
A curto prazo o obxectivo é consolidar a empresa, as dúas cabeceiras e, en definitiva, gañar máis confianza, ter máis proxección social
—E do bo, que destacaría?
A totalidade do proxecto, a capacidade de seguirmos xerando ilusións, esperanzas, de seguir dando voz a quen non a ten, de ofrecer unha visión da Galiza e do mundo desde unha perspectiva propia.
—Hoxe reúnese a Xunta Xeral de Accionistas de Sermos Galiza. Cales son os novos obxectivos da empresa a curto prazo?
Os obxectivos a curto prazo céntranse en desenvolver unha serie de estratexias económicas, xornalísticas, de publicidade... que teñen como obxectivo consolidar a empresa, as dúas cabeceiras e, en definitiva, gañar máis confianza, ter máis proxección social e criar condicións que nos permitan podermos seguir outros dez anos, polo menos.
En galego, con todos os acentos
'En galego con todos os acentos' é o lema da campaña realizada polo deseñador Pepe Barro -creador da liña gráfica e da maqueta de Sermos Galiza e de Nós Diario- coa que se conmemora a aparición do semanario Sermos Galiza hai dez anos, a 8 de xuño de 2012. Este primeiro número do semanario supuxo a volta do galego á prensa en papel, e para conmemorar esta década, Sermos Galiza S.A. organiza hoxe un acto de convivio en Compostela.
Ofrecerá unhas palabras de benvida para o público a directora de Nós Diario, María Obelleiro, dando paso á actuación de Celso Sanmartín, contacontos e poeta. Seguirá a música da cantante e compositora Su Garrido e porá o ramo ao acto o presidente e conselleiro delegado da empresa Sermos Galiza S.A., Xoán Costa.
