O Tribunal Superior de Xustiza da Galiza vén de anular a sentenza da Audiencia Provincial de Ourense que absolveu dos delitos de homicidio consumado e de homicidio por omisión ao mozo de Nerea Añel ao ser contraria ao veredicto de culpabilidade emitido polo xurado. Por iso, ordena retrotraer as actuacións ao momento anterior a ditarse a resolución para que se emita outro fallo de acordo coa vontade do xurado popular.
No xuízo decorrido na Audiencia Provincial ourensá a finais do pasado mes de febreiro, o xurado popular, formado por nove cidadáns, declarou o acusado, parella da vítima, culpábel dun delito de homicidio por omisión.
Os membros do xurado consideraron probado que o home estaba con Nerea a noite que ela desapareceu e, en concreto, que estaba con ela no momento no que sufriu unha caída e non lle prestou auxilio. Con todo, a Audiencia Provincial contradixo o veredicto do xurado popular, de maneira que o absolveu porque "non se pode determinar se a prestación de asistencia médica evitaría a morte", polo que non vían probado o delito de homicidio por omisión. Fiscalía e acusación particular, que exerce a nai da vítima, pediron ao TSXG que se revogase a sentenza.
E, após esa vista, agora o alto tribunal galego declarou nula, por alcanzar "unha conclusión diferente á emitida polos xurados, que atenderan a tese acusatoria", a sentenza na que a Audiencia Provincial de Ourense absolveu o acusado.