A EPA correspondente ao IV trimestre de 2016 fixaba en 204.200 as persoas que estaban no paro en Galiza. O noso país presenta unha taxa de desemprego de 16,3%, a máis alta entre as autonomías do norte do estado español [en Euskadi, Nafarroa e Cantabria non chega a 13%. En Asturies, Castela-León, Madrid, Aragón e Catalunya anda entre 13 e 15 por cento]. Deses máis de 200.000 desempregados, a maioría leva máis dun ano nesa situación, é dicir, son parados de longa duración. Son perto de 119.000, 58% do total. E, noutro dado preocupante, hai 88.000 persoas no desemprego que levan nesa situación dous ou máis anos. 43% do total de parados do noso país. Unha porcentaxe abrumadora, pois indica que de cada 10 persoas que hai no paro en Galiza, 4 levan así máis de 24 meses.
En Galiza o número de fogares onde non entra ningún tipo de ingreso supera os 37.000. Un incremento de 88% se o comparamos co ano 2009. Os sindicatos advirten do insostíbel desta situación, en que se sitúa miles de familias galegas á beira da pobreza e a exclusión social. No noso país hai, tamén segundo a EPA, 69.600 fogares con todos os seus membros no desemprego.
É unha cifra que supón unha mellora a respecto do ano anterior, 2015, cando eran 75.000 os que padecían esa situación. Porén, é un número que é 55% superior ao que había en 2009. E supera en 4.400 fogares os que estaban rexistrados en 2011 con todos os seus membros no paro.
Os sindicatos coinciden en reiterar que tras estas estatísticas e dados atópanse "familias e persoas con nomes e apelidos que están en risco de exclusión social". “A situación é cada vez máis preocupante, xa que vemos como se está a afondar na consolidación da figura do traballador pobre”, ten indicado Miguel Malvido, secretario confederal de Emprego e Industria da CIG.