Centos de delagados da CIG tomaron parte en Vigo na primeira das accións do sindicato nacionalista no marco dunha campaña para reclamar traballo digno na comarca: Unha asemblea de delegados e unha manifestación que finalizou diante da sede da Xunta na cidade.
Alberto Gonçalves, de CIG-Vigo, alertou da situación de crise que padece a bisbarra e que ameaza con convertela “nun deserto industrial”. Fronte a isto, reclamou unha verdadeira política industrial que apoie os principais sectores produtivos (naval, automoción, construción, pesca, etc) mediante o fomento da iniciativa pública.
O secretario nacional da CIG-Industria, Xoán Xosé Bouzas, considera especialmente preocupante a situación de crise que padece unha industria estratéxica como é o naval. “O caso de Vigo é gravísimo, xa que se perderon uns 10.000 empregos en nove anos, quedando na actualidade menos de 1000 traballadores/as no sector”.
Suso Seixo, secretario xeral da central nacionalista, fixo especial fincapé no interese da patronal en rematar coa negociación colectiva co obxectivo de individualizar as relacións laborais. “Pretenden centralizar os convenios a nivel estatal para reducir a posibilidade de que poidamos incidir neles e melloralos”. Seixo reivindou a importancia da mobilización social e reivindicou a necesidade de que o noso país conte con plena soberanía.
