As ITV galegas declararanse en folga indefinida a partir do 16 de setembro se a empresa concesionaria, SyC Applus, non abandona a súa postura "inmovilista".
Así o aseguraron os sindicatos da mesa negociadora –CSIF, CCOO, CIG e UXT– nunha concentración que secundaron decenas de traballadores e delegados fronte á Xunta da Galiza en Santiago esta sexta feira.
'Por un convenio xusto, nos tamén somos traballadores e traballadoras' e 'Salarios xustos e convenios dignos na Galiza' son algunhas das mensaxes que se lían nas pancartas que portaba o persoal concentrado diante da Xunta en San Caetano.
Un dos membros da mesa negociadora pola CIG, Rodrigo Fragueiro, lamentou ante os medios que "non hai acordos" naqueles puntos que consideran "esenciais", aqueles referentes a unha suba salarial, a unha redución de xornada e a eliminar as diferenzas entre o persoal administrativo e de nave.
Neste sentido, unha administrativa da ITV de Foz (A Mariña), en representación de UXT, asegurou que mentres que os traballadores de nave poden ascender, para os que se atopan na administración é máis complicado, ademais de percibir "moitísimos cartos menos" anualmente.
Non hai negociación aberta
Por outra banda, un dos membros do comité de folga por CCOO José Antonio Pastoriza Corbacho, reiterou en declaracións a Europa Press que a actitude da empresa é "inmovilista" e que a mesa negociadora está "bloqueada".
Neste sentido, asegurou que desde a última reunión, decorrida esta segunda feira en Santiago, "non hai ningún tipo de achegamento". Pastoriza indicou que a reivindicación que máis freou a negociación é a que se refire á redución da xornada.
Deste xeito, o cadro pide non traballar os sábados, "igual que as administracións públicas", pero despois dunha reunión "esgotadora", a empresa "non quere ceder".
Ademais, subliñou que mentres as tarifas "subiron" este ano, este incremento non repercute nos salarios dos traballadores que, pola contra, "perden poder adquisitivo".
Incerteza
O portavoz de CSIF, Carlos Candanedo, afirmou que "non poden perder a esperanza", pero tamén senten "incerteza" porque non hai máis reunións convocadas e "non saben cal é o paso que vai dar a empresa".
"Descoñecemos cales son as súas intencións, se está disposta a manter o pulso ou, se pola contra, decide sentar e tentar buscar unha solución ao conflito", asegurou.
Neste sentido, e despois de seis xornadas de folga cun apoio "masivo", os sindicatos reiteraron que a súa intención é que a empresa "se dea conta do apoio" que teñen e de que, se non chegan a un acordo, "van ter un problema paralelo".
Os sindicatos lamentaron que o PP aínda non se sentase a escoitar as súas reivindicacións, ao tempo que lembraron que esta quinta feira reuníronse tanto con BNG como con PSOE. Neste sentido sinalaron que a Xunta ten unha "responsabilidade inherente" a este servizo, polo que piden que "tome medidas" neste conflito que afecta á cidadanía galega.
Repercusión para a poboación
Con todo, CSIF, a preguntas sobre a posibilidade de que os condutores poidan ser multados por ter a ITV caducada e non poder renovala debido ás folgas, afirmou que, por lei, "non hai escusa algunha e esa posibilidade de sanción existe".
Aínda así, nunha nota de prensa explicou que "descoñece" se desde Tráfico hai ou haberá algún tipo de instrución para ser "benevolentes" cos usuarios que se atopen nesta circunstancia.
