industria láctea

A Federación rural galega ten clara a responsabilidade da Xunta no baixo prezo do leite galego

A conselleira de Medio Rural, Rosa Quintana,recibeu á federación por primeira vez nesta lexislatura

A Federación Rural Galega denuncia as incoherencias da Consellaría de Medio Rural. Reafírmase no seu apoio ao sector mentres ten paralizada a Mesa do Leite e do Observatorio do Sector Lácteo.

A Federación Rural Galega (Fruga) exixiu esta terza feira á Consellaría do Medio Rural a posta en marcha da Mesa de Interlocución Láctea da Galiza ante a chegada dos novos contratos de compra ás explotacións leiteiras galegas como consecuencia das renovacións do mes de abril, os cales implican "unha baixa que varia entre dous e catro céntimos por litro dependendo da empresa". "Estamos ante unha baixada que en ningún caso é xustificada, e que vai supor dificultades para moitas gandarías galegas, especialmente para as explotacións máis intensivas, tendo en conta que calquera baixada no prezo do leite nestas granxas supón unha importante mingua dos ingresos", explicou a Fruga. "Esta baixada dos prezos non se leva adiante en base ás variacións que se poden dar nos custos de produción, senón que deriva principalmente de cuestións de mercado", sinalou o sindicato. "As variacións nos prezos, neste caso cara abaixo, responden única e exclusivamente aos intereses das propias industrias e a operacións especulativas no mercado mundial cos derivados lácteos", engadiu a organización. Por isto, a Fruga quixo deixar patente "a indefensión que padecemos os gandeiros e as gandeiras galegas" e que as Administracións "miran para outro lado".