O gaélico da Galiza pon a mira nos Campionatos Ibéricos

A localidade catalá de Salou foi a sede escollida para recibir a fase final dos Campionatos Ibéricos de fútbol gaélico, que se desenvolverán integramente o próximo sábado, 18 de maio. Nese torneo do único deporte no que a Galiza está autorizada a competir oficial e internacionalmente o representante do país na categoría sénior masculina será Fillos de Breogán, que colidirán cos Celtíberos de Lisboa, os locais do Barcelona Gaels e os valencianos do Sant Vicent. Con respecto ás mulleres, Turonia Gondomar e Estrela Vermelha medirán forzas co Barcelona Gaels, o Madrid Harps e o Costa Gaels, un conxunto que ten a súa base na área da Costa do Sol.