O goberno de Bolivia anunciou a comezos deste mes o inicio dun curso intensivo para que uns 300.000 funcionarios aprendan un idioma nativo no prazo dun mes, segundo recolle o diario dixital boliviano Erbol . “Todos os funcionarios están convocados para aprender o idioma onde traballan. Os servidores públicos teñen a obriga de aprender unha lingua orixinaria e, nesta caso, van aprender o aimara”, dixo o vice-ministro de Descolonización, Félix Cárdenas.
O executivo promulgou en agosto de 2012 Lei xeral de dereitos e políticas lingüísticas, unha norma que obriga aos servidores públicos a aprender unha das linguas indíxenas de Bolivia nun prazo de tres anos.
“Vemos que pasa e pasa o tempo e aínda temos a funcionarios sen saber ningún idioma. Calquera servidor deste proceso ten que se dar conta de que ten que ter máis capacidade de transmitir, de escoitar, de ter unha boa discusión política nun idioma orixinario”, sinalou o ministro de Cultura, Marco Machicao.
En Bolivia hai 37 idiomas oficiais para alén do español. Entre os máis falados, o aimara, quechua ou guaraní.
