ERC no ollo do furacán

Esquerra Republicana de Catalunya atópase estes días no que posibelmente é o momento máis transcendental da súa longa historia política. Despois dos malos resultados encadeados nas diversas eleccións, especialmente nas autonómicas, ERC enfróntase a unha división interna grandísima, que xa non se pode disimular, e ao mesmo tempo participa dunhas negociacións para a investidura do futuro president da Generalitat. Nas próximas horas, este fin de semana seguramente, algúns dos interrogantes que a rodean aclararanse, mais ninguén sabe a onde conducirá isto. É evidente que a Presidencia de Pere Aragonès será un paréntese e que os republicanos non volverán ter un president en moitos anos, quizais en décadas. A cuestión máis preocupante, desde o punto de vista independentista, é se o partido acabará roto e converténdose de novo nunha formación marxinal no sistema catalán de partidos. A crise interna é dunha dimensión colosal. Oriol Junqueras e Marta Rovira, que formaron o tándem que levara o partido de Macià e Companys aos mellores resultados desde os tempos da república española, están agora completamente enfrontados en dous bandos irreconciliábeis que loitan polo control do partido, un control que se decidirá no congreso previsto para este outono. E nesta loita vale todo. Mesmo lavar en público os trapos sucios do partido. Neste sentido están aparecendo á luz episodios nada edificantes que teñen que ver coa existencia desde hai anos dunha cloaca política dentro de ERC que se dedicaba a facer operacións sucias de desinformación e manipulación contra os seus adversarios políticos. O caso máis soado foi o recoñecemento por parte da dirección do partido de que uns polémicos carteis que asociaban o alzheimer con Ernest Maragall e o seu irmán Pasqual (que o padece desde hai anos) foron unha iniciativa de falsa bandeira xurdida de dentro da propia ERC. Este recoñecemento custou a dimisión de Sergi Sabrià, o home clave da comunicación do partido que actualmente exercía de viceconseller na Generalitat. Outro caso que tamén provocou moita polémica é o coñecemento de que un boneco simulando Junqueras que foi colgado en 2019 nunha rúa por onde pasaban os fillos deste -e que provocou acesas condenas pola crueldade, xa que daquela Junqueras aínda estaba no cárcere- tamén foi unha iniciativa xurdida e financiada por ERC. É gravísimo que se estea facendo público que ERC tiña un aparello interno dedicado non a informar á cidadanía sobre as súas propostas senón a desinformar e manipular á xente. E, como é lóxico, toda esta sucidade está afectando moito á imaxe do partido. En medio disto e en medio da batalla campal por ver quen controla a formación -batalla que todo indica que gaña claramente Oriol Junqueras-, ERC está negociando un acordo político de investidura que será un terremoto xa que investirán o candidato socialista e gran defensor da violencia española do Primeiro de Outubro, Salvador Illa. O acordo, a cambio de nada, anunciarase nas próximas horas e en teoría debe ser aprobado polas bases do partido. A cúpula parece que está decidida a votar favorabelmente porque ten pánico a unha repetición electoral no mes de outubro que podería deixalos nunha cifra ridícula de deputados e porque tería pactado cos socialistas que moitos cargos de Esquerra continuarán cobrando do salario público a cambio do seu voto. A incógnita das bases Pero que farán as bases? Esta é a gran incógnita. Hai unhas semanas ERC xa intentou pactar cos socialistas no Concello de Barcelona e tiveron que frear pola rebelión da base, que se negaba a aceptar o pacto. Podería ser que agora volvese pasar o mesmo. Ou podería ser que unha das partes en conflito aproveitase a situación para destruír á outra. A votación, que podería ser para o primeiro día de agosto, será en calquera caso explosiva xa que as bases están realmente enfadadas cos dirixentes do partido. Se ERC inviste Illa, o president Puigdemont -tal e como se comprometera- volverá ao país Con un engadido que non se pode descoidar. Se ERC inviste Illa, o president Puigdemont -tal e como se comprometera- volverá ao país. Pero coa rebelión xudicial en marcha, negándose a aplicarlle a amnistía, isto significa que o president será detido e levado ao cárcere a Madrid. Non se sabe por canto tempo. Con toda probabilidade isto ocorrerá o mesmo día: Esquerra fará president un dirixente socialista virulento contra o Primeiro de Outubro ao tempo que España encarcerará o president do Primeiro de Outubro. Parece un escenario moi envelenado, que pon aos republicanos no ollo do furacán...