Un xulgado andaluz imputou Francisco García Santaella, coronel da Garda Civil destinado actualmente na Dirección Xeral facendo un curso para ascender a xeneral, nunha investigación sobre narcotráfico. A nova, desvelada por ‘El Diario’, sinala que o xulgado considera verosímiles as confesións de 2 traficantes arrepentidos que aseguran que pagaron case 400.000 euros a este alto cargo da GC para que lles permitise introducir na Península 6 toneladas de haxix.
Estas confesións fixéronse por separado e sen coordinarse, e nas mesmas tamén afirmaron que García lles facilitou alixos incautados para que os revendesen. O pago fíxose, din, en dependencias da Garda Civil en Granada. O xulgado considera que hai indicios de abondo para acusar o coronel de colaborar na introdución de tres alixos pola costa de Granada entre 2005 e 2006.
Non é o primeiro caso de relación entre narcotráfico e altos mandos do instituto armado español. Un dos máis coñecidos foi o de Rodríguez Galindo, máximo mando da GC en Euskadi. Durante a súa carreira foi sinalado por diversos medios de comunicación por relacionalo co narcotráfico e trata de brancas. Mais a causa foi arquivada. Porén, en 2006, saía á luz un informe secreto do Servizo de Información da Garda Civil de 1992 no que se admitía que Galindo se lucrara co narcotráfico, remitindo parte dos beneficios desta actividade a financiar a guerra suxa contra ETA e outra aos petos do propio coronel da Garda Civil.
Galiza
Esta relación tampouco é descoñecida en Galiza. Un dos últimos episodios foi entre finais de 2013 e principios de 2014, en que foron detidos cinco grada civís na provincia de Pontevedra pola súa presunta relación con redes de narcotráfico.
