Pepe Mújica non pode recuncar este domingo como candidato do Frente Amplio por limitación constitucional, mais non dubida dunha vitoria do FA conducida polo combo Tabaré Vázquez e Raúl Sendic. “Eu confío en que o pobo uruguaio vai manter o rumbo” manifestou Mujica nunha entrevista coa axencia arxentina Télam. O presidente uruguaio sinala que nestes anos de goberno frentista a vida de moitas persoas mellorou sensibelmente, alén de se daren avanzos en dereitos sociais e laborais e na creación de emprego.
As últimas enquisas concordan en apontar que haberá ‘balotaje’ (segunda volta) pois o Frente Amplio non conseguirá o domingo a maioría absoluta dos votos emitidos. En Uruguai o voto é obrigatorio. Sondaxes como a da canle VTV outorgan ao FA o 40,2% dos apoios nas urnas polo 27,7% do Partido Nacional ou o 11,3% do Partido Colorado.
En Interconsult concédenlle ao Frente Amplio o 44% dos votos, ao PN o 33% e Partido Colorado, 13%. Nos medios de comunicación uruguaios máis opositores ao goberno de Mújica e ao FA (El País) avogan por un pacto entre Partido Nacional e Partido Colorado no Parlamento para imporse ao FA.
"Contra a imposición"
Pola súa parte, o principal líder da oposición, Luis Lacalle (Partido Nacional), defendeu o seu proxecto como o mellor para Uruguai pois rodeouse, di, “dos mellores”. Pediu o apoio para “un goberno de conviccións e non un goberno de imposicións como o destes anos de Frente Amplio”.