O presidente ruso, Vladímir Putin, ordenou esta quinta feira ao ministro de Defensa do país, Serguéi Shoigú, declarar un alto do fogo desde o mediodía do 6 de xaneiro até as 24:00 do 7 de xaneiro (hora das zonas en conflito), é dicir durante o Nadal en base ao calendario ortodoxo.
Neste contexto, Moscova instou a Kíiv a que tamén declare unha tregua nesta data. "Dado o gran número de cidadáns ortodoxos que viven nas zonas de conflito, pedimos á parte ucraína que declare un cesamento do fogo e permita asistir aos oficios tanto en Noiteboa como en Nadal", reza o comunicado publicado polo Kremlin.
Previamente esta xornada, o patriarca Kiril, cabeza da Igrexa ortodoxa rusa, pediu un cesamento ao fogo e unha tregua do Nadal para que os crentes ortodoxos poidan asistir aos servizos relixiosos.
Pola súa parte, o asesor do xefe da Oficina presidencial ucraína, Mijaíl Podoliak, cualificou os chamamentos dun cesamento do fogo de "unha trampa cínica e un elemento de propaganda".
