De que democracia nos falan?

Pasan os meses e o Estado sionista israelí intensifica a súa política de “solución final”. Ocupar totalmente o territorio histórico palestino, expulsar a maioría do seu pobo, manter o resto en réxime de apartheid como man de obra barata. Sen límites, asasinatos masivos, incluídos miles de nenas e nenos, miles de detencións arbitrarias, tortura sistemática documentada, destrución de infraestruturas, tamén sanitarias e educativas, desprazamento forzado, fame, sede, enfermidade. Se non é nazismo, aseméllaselle moito. O xenocidio dun pobo en pleno século XXI, que a ninguén se lle escapa, non sería posíbel sen o apoio indisimulado do Imperio USA e os seus estados satélites, non xa simples cómplices senón absolutos corresponsábeis da morte e destrución. Fronte a unha política inaceptábel para calquera ser humano, arman os sionistas até os dentes, prestan apoio militar, defenden politicamente os asasinos nos foros internacionais. E para calmar as conciencias e narcotizar as e os desconformes, laios hipócritas e chamadas ao alto e fogo que nunca se efectivizan. Para máis burla, mentres a Rusia a sancionan economicamente, censuran os seus medios de comunicación ou a exclúen de calquera evento internacional, pola guerra na Ucraína, os xenocidas participan sen problema algún de Eurovisión e das Olimpíadas. Dobre vara de medir, podremia das “democracias occidentais”. Corresponsábeis a maioría das forzas políticas españolas. Do apoio absoluto da caverna dereitista aos asasinos sionistas con Feijoó ou Aznar á fronte, esa caverna que, por certo, afirma crer en deus, vai a misa, desfila nas procesións católicas e proclama a “superioridade moral” do cristianismo fronte ao islam, ao do hipócrita “goberno progresista” que consciente do rexeitamento de parte da súa base electoral ao xenocidio, pasou de aparentar belixerancia con Israel “recoñecendo o Estado palestino” durante a campaña das europeas, ao silencio absoluto unha vez rematadas, mentres segue a vender armas para a matanza. Apoio incondicional de USA ao sionismo Lamentabelmente non se albiscan mudanzas que a curto prazo melloren a situación para un pobo palestino condenado ao exterminio. En novembro na democracia USA volverán ser os millonarios “doantes” quen decidirán substituír o decrépito Biden por Trump ou a “nova esperanza” Harris. Tanto ten, o imperio manterá inalterábel o incondicional apoio ao sionismo xenocida e os democráticos estados da súa órbita, nomeadamente os europeos, seguirán acriticamente a súa política. Ás palestinas pouco máis lles quedará, a súa admirábel capacidade de resistencia e o apoio dos pobos do mundo. Foron os colonialistas europeos coa Gran Bretaña á cabeza quen decidiron enxertar artificialmente un estado sionista en terra palestina. A súa salvaxe actuación contra a súa poboación non comezou o 7 de outubro, só se volveu obscenamente máis crúa. As cifras da catástrofe humanitaria arrepían a calquera que non sexa unha besta parda. Moitísimos máis mortos en Gaza dos 40.000 dos que se fala que, ou xa non se contabilizan, ou están baixo os escombros, decenas de miles de nenas e nenos asasinados ou desaparecidos, sen atención médica, incontábeis persoas feridas e amputadas, intervidas no mellor dos casos sen anestesia nin antibióticos falecen, como moitas persoas, por enfermidades comúns non tratadas, desnutrición, lixo acumulado, sen rede de sumidoiros… Evidencian a crueldade dos xenocidas, tamén actuantes no outro campo de concentración que manteñen na Cisxordania, por máis que alí non goberne Hamás, senón a tan imaxinaria como ineficaz Autoridade Nacional Palestina. Unha inimaxinábel realidade que non fará máis que agravarse se non se lle pon freo. Neutralidade ante o desastre Unha boa parte da poboación, con acceso a unha “información” tan habilmente manipulada como “neutral”, non é consciente da magnitude do desastre, mais os dirixentes políticos das “democracias occidentais” si. É difícil de entender como poden durmir tranquilos, como poden seguir mantendo que “Israel ten dereito á defensa” cando é evidente que é o agresor ou tratan de calar a quen se manifesta a prol da xusta causa palestina coa cualificación de “antisemita” e a simple e pura represión. Só é explicábel desde o colapso e degradación moral desas democracias que dirixen e que persistentemente proclaman uns valores na práctica inexistentes. Vello colonialismo, corresponsabilidade no xenocidio e no apartheid definen a acción deses dirixentes dos estados que se autodefinen democráticos. A pregunta é: de que democracia nos falan?