Máis voces desde o tecido produtivo contra o proxecto de Altri para Palas de Reis (A Ulloa). Desta vez, a Plataforma de produtores e produtoras de ecolóxico de Galiza (Proecogal), que teme polo impacto do proxecto no tecido socioeconómico na Ulloa e comarcas veciñas.
“Dende o noso colectivo entendemos que o modelo de industrialización formulado para o interior galego non pode pór en risco o tecido socioeconómico existente no territorio e especialmente o tecido agrogandeiro, que garante a cohesión territorial xerando un forte impacto”, sinalan nun comunicado.
A plataforma apunta que “é imprescindíbel que se teña en conta a produción ecolóxica á hora de valorar a viabilidade dun proxecto así dende o punto de vista ambiental, tendo en conta o impacto sobre a produción e o posible risco que representaría para a certificación das producións ecolóxicas. Máis aló, cómpre valorar a afectación a nivel de mercado, e percepción das consumidoras”.
Poñen o acento nos traballos e análises que se están dando a coñecer sobre as posíbeis consecuencias e repercusións que esta factoría podería ter para afirmar que a proposta de Altri “pon en risco a actividade agrogandeira de Galiza, un dos sectores tractores da nosa economía”.
Apuntan ao consumo insostíbel de auga, ás emisións dunha planta destas características, á presión sobre os usos da terra, como motivos para argumentar ese rexeitamento ao proxecto para A Ulloa.
“Entendemos que representaría unha ameaza dende o punto de vista do seu impacto ambiental e socioeconómico, especialmente para o tecido que conforma a produción ecolóxica da Galiza”, conclúen.
