Agora

Unha muller resultou ferida de consideración ao ser mordida por un can no municipio de Santiso. Segundo informou o CIAE 112 Galiza, o suceso produciuse esta sexta feira. Até o lugar mobilizouse o helicóptero medicalizado de Urxencias Sanitarias 061 para atender a muller, que caeu ao chan despois de ser atacada polo can. A muller ferida foi recollida no centro de saúde de Melide para o seu traslado ao hospital.

A sección segunda da Audiencia da Coruña prepárase para os días 18 e 19, con Tribunal de Xurado, para albergar o xuízo contra un home de 85 anos acusado de homicidio do seu cuñado. Por uns feitos que se remontan a xuño de 2019 no domicilio familiar, en Cabana de Bergantiños, A Fiscalía pide dez anos de prisión, coa atenuante de lexítima defensa. O acusado, segundo recolle o escrito de cualificación fiscal, vivía no citado municipio xunto á súa irmá e o esposo desta, ambos os octoxenarios e alega que foi un acto de autodefensa.

A Garda Civil mantén abertas todas as hipóteses en relación á desaparición dun veciño de Culleredo (comarca da Coruña) en cuxa casa atoparon restos de sangue e un casco de bala. Trátase dun home de 50 anos que falta do seu domicilio na zona de Orro desde a pasada sexta feira. Foron os seus familiares quen denunciaron a desaparición. Ao lugar desprazáronse axentes da Garda Civil que acharon os restos de sangue nalgunhas zonas da vivenda e o que podería ser un intento de limpar os mesmos. Sobre os fragmentos de munición, fontes próximas ao caso citadas pola axencia Europa Press precisaron que o home era "afeccionado ás armas". Aliás, o coche deste home tíñao un amigo ao que xa se tomou declaración.

O envorco dun camión de transporte de animais á primeira hora da mañá provocou o corte da estrada N-640 á altura de Silleda (Deza). O condutor non resultou ferido e puido saír da cabina coa axuda duns particulares que acudiron a auxilialo. Malia que os animais non escaparon, o sinistro provocou a vertedura de combustíbel e aceite, polo que se requiriu a intervención dos bombeiros do Deza. Eran pasadas as 6 horas da mañá cando un particular chamou o 112-Galiza para informar do envorco do camión ocorrido no quilómetro 186 da N-640. Nese momento, o vehículo ocupaba o carril dereito e o condutor xa estaba fóra.

Un home de 50 anos de idade morreu a pasada noite ao sufrir un atropelo no municipio barbanzán da Pobra do Carmiñal. Segundo a información transcendida, ía sen chaleco reflector e estaba "tombado no medio da estrada" cando foi alcanzado polo coche. Ocorreu contra a medianoite no quilómetro 30,500 da estrada AC-305, que vai desde Ribeira até Padrón. O 061 mobilizou unha ambulancia de soporte vital básico con persoal de Atención Primaria. Con todo, só puideron confirmar o falecemento deste home.

O presidente da Deputación de Ourense, Manuel Baltar, confirmou que Fiscalía pide, por mor do seu exceso de velocidade, que lle retiren o carné e que abone unha sanción económica, unha pena coa que está desconforme ao entender que está sustentada en argumentos xurídicos "perfectamente recurríbeis". De feito, confía en parar o proceso sen chegar ao xuízo.

O comité de empresa do servizo de cociña dos tres hospitais públicos de Vigo (Álvaro Cunqueiro, Meixoeiro e Nicolás Peña) anunciou a convocatoria dunha folga indefinida a partir do próximo día 18 de maio, co obxectivo de reclamar o mantemento de todos os postos de traballo. Todo iso, tal como indicou a CIG nun comunicado, ante a posibilidade de que se produzan despedimentos co cambio de concesión. O sindicado, que ten maioría no comité, explicou que a folga pretende tamén renovar a maquinaria das cociñas, polo que lembraron que a obrigación é da concesionaria do hospital.

Produtores de carne colapsaron o centro de Lugo esta quinta feira cunha tractorada formada por uns 400 vehículos, segundo estimación da convocante Asociación de Gandeiros Galegos da Suprema, para reclamar "prezos xustos" e denunciar os "recortes" na nova Política Agraria Común (PAC). O seu presidente, Santiago Rego, denuncia que cobran polo quilo de carne 'Suprema' arredor de 5,70 euros, o que supón un euro menos do que lles custa producir e con prezos "de hai 30 anos", polo que esa cifra debería subir até uns 7 euros para non vender a perdas, o que sería "un prezo razoábel, sen contar loxicamente co beneficio que se pode ter como calquera traballador polo seu traballo".

CCOO e CSIF anuncian a convocatoria para o 7 de setembro dunha xornada de folga de 24 horas en todos os centros da Seguridade Social, a primeira na historia deste organismo, ante a falta de efectivos, o atraso na xestión das prestacións e o incumprimento xeral dos acordos de persoal, segundo denuncian ambos os sindicatos. CCOO e CSIF, dando continuidade ao conflito no ámbito da Seguridade Social tras as convocatorias de mobilizacións e concentracións iniciadas ao longo do segundo semestre de 2022 e durante o ano 2023, levarán a cabo tamén paros parciais ao longo do mes de maio, todas as sextas feiras, de 10.30 a 11.30 horas, nos centros das entidades xestoras e servizos comúns.

A Garda Civil detivo un veciño de Culleredo (comarca da Coruña) como presunto autor dun delito contra a seguridade viaria e outro de lesións, por esparexer gas pementa no interior dun autobús o pasado 24 de abril. Segundo informa o Instituto Armado, ocorreu nun autocar que cubría a liña A Coruña-Carral e o condutor viuse obrigado a deter a marcha e desaloxar os viaxeiros en Vilaboa. Algúns deles, de feito, sufriron lesións leves e precisaron asistencia sanitaria por irritación de ollos e gorxa. Dado que o autor dos feitos fuxiu ante a inminente chegada da Policía Local de Culleredo, a Garda Civil iniciou unha investigación para identificalo. A través de recoñecementos practicados a testemuñas prexudicadas, o Instituto Armado conseguiu dar co responsábel.

Un home resultou ferido na localidade de Forcarei tras caerlle nunha perna o remolque do seu tractor. Tal como informou o 112 Galiza, o home traballaba na súa leira, situada no lugar de Pontefreixeira, cando sucedeu o accidente. Foi un particular o que alertou aos servizos de emerxencia, polo que á súa vez deron aviso aos profesionais de urxencias sanitarios e á Garda Civil. O home foi trasladado ao Hospital Montecelo.

A Xunta deu a coñecer esta cuarta feira o calendario dos exames de oposición para máis de 1.500 prazas ás que aspiran case 69.000 persoas. Os 24 exames das ofertas de emprego público para a Administración galega arrincarán o próximo 10 de xuño e estenderanse até o 9 de xullo.

A elas súmanse os procesos de estabilización que se desenvolverán entre setembro e marzo de 2024. Repartiranse da seguinte forma: cinco en setembro, 11 en outubro, cinco en novembro, dous en decembro, 25 en xaneiro, 12 en febreiro e un en marzo.

A Policía Nacional desenvolveu esta terza feira en Arousa un novo operativo contra o tráfico de droga que se saldou con dúas persoas detidas e unha importante cantidade de droga incautada.

En concreto, a intervención da Brigada Central de Estupefacientes tivo lugar na localidade de Vilanova de Arousa, unha área que hai só dúas semanas viviu outro grande operativo de loita contra o tráfico de cocaína, nese caso con 10 detidos.

Os secretarios xerais Dos sindicatos CCOO e UXT, Unai Sordo e Pepe Álvarez, e os presidentes de CEOE e Cepyme, Antonio Garamendi e Gerardo Cuerva, respectivamente, subscribiron esta cuarta feira o V Acordo para o Emprego e a Negociación Colectiva (AENC) que recomenda unha sua salarial de 10% entre 2023 e 2025. O acordo deixou fóra o ano 2022, no cal os salarios perderon poder adquisitivo pola subida da inflación.

Culturgal arrinca este 2023 cunha nova persoa á fronte: Camilo Franco. O xornalista cultural e escritor, "cun perfil transversal que engloba tamén a xestión cultural", destacan desde a organización, asume o posto de director cunha folla de ruta que responde ás bases da convocatoria lanzada pola directiva da feira o pasado febreiro, segundo a cal o cargo poderá prorrogarse varios anos. A 16ª edición da Culturgal —do 1 ao 3 de decembro—, adiantan, promete ser fiel á esencia da feira como un "escaparate integrador das culturas galegas orientado aos públicos".

O funcionariado da administración de Xustiza acordou "endurecer" a súa postura de paros parciais diarios e de xornada completa puntuais que comezaron o pasado 17 de abril de forma indefinida para reclamar melloras salariais, advertindo agora de que pasarán a facer unha "folga total" a partir do 22 de maio se o Goberno español, nos próximos dez días, "non pon enriba da mesa unha proposta económica". Afirman que o seguimento das protestas segue a medrar e, consecuentemente, os xulgados acumulan milleiros de procedementos pendentes.

A Garda Civil de Ourense interceptou a pasada sexta feira un menor de idade que conducía un vehículo a pesar de carecer de permiso e que, ademais, estaba baixo a influencia do alcol. Ao mozo acompañábao o seu pai, que non puido facerse cargo do coche dado que tamén estaba ebrio. Os feitos sucederon contra as 23.45 horas no quilómetro 580 da estrada N-120, nas proximidades de Santa Cruz de Arrabaldo, en Ourense. Ao deter o coche, que se dirixía á localidade de Punxín, os axentes observaron que o seu condutor presentaba "síntomas evidentes de encontrarse baixo a influencia de bebidas alcólicas". De feito, arroxou un resultado positivo de 0,52 mg/l na primeira proba e de 0,51 mg/l na segunda.

O Sergas fai esta cuarta feira un chamamento á doazón de sangue, tras constatar que ten en nivel baixo as reservas dos tipos 0 negativo e B negativo. Ademais, segundo traslada a Axencia de Doazón de Órganos e Sangue (ADOS) nun comunicado, están en nivel normal os grupos A+, A- e 0+, mentres que só os B+, AB+ e AB- están nun bo nivel. Para poder atender todas as persoas doentes que, por calquera motivo, precisen unha transfusión, o Sergas estima que son necesarias unhas 500 doazóns diarias.

O xurado de Manhattan vén de declarar o ex presidente dos EUA Donald Trump como culpábel de abusar sexualmente da escritora E. Jean Carroll, aínda que non considera que houbese violación. O ex mandatario terá que pagar, por tanto, 2 millóns de dólares como indemnización. Trump, que rexeitou acudir ao xuízo, estaba acusado de agredir sexualmente a a columnista e de difamala despois afirmando que se inventou a historia. 

Un home faleceu esta terza feira ao sufrir unha caída cando practicaba ciclismo de montaña nuns circuítos situados no parque forestal da Fracha, en Pontevedra. O falecido é un home de 51 anos veciño de Cambados que saíu da súa casa pola mañá para realizar ciclismo, segundo confirmaron fontes dos servizos de emerxencia. Ante a tardanza, os seus achegados comezaron a buscalo e presentaron unha denuncia ante a Garda Civil. Unha persoa deu a voz de aviso tras localizar o seu corpo sen vida no circuíto de mountain bike da Fracha.