Agora

O presidente do Deportivo da Coruña, Antonio Couceiro, confirmou que están a ultimar os preparativos para instalar a capela ardente do histórico adestrador e xogador do club Arsenio Iglesias no estadio de Riazor, após o seu falecemento esta sexta feira aos 92 anos. A capela ardente poderá visitarse esta sexta feira desde as 21.30 até as 23.30 horas, e o sábado entre as 9 e as 12 horas.

Un mozo de 22 anos, veciño de Monforte de Lemos, faleceu esta sexta feira nun accidente de tráfico rexistrado no municipio de Pantón (Terra de Lemos), ao colidir a moto que conducía contra un camión. O suceso tivo lugar sobre as 17.40 horas na N-120. A moto na que viaxaba a vítima mortal colidiu lateralmente contra un camión.

O Tribunal Superior de Xustiza da Galiza (TSXG) avalou unha sentenza de primeira instancia e condena o Sergas a pagar 150.000 euros por non activar o sistema ‘Código ictus’ para un paciente ferrolán, causándolle un posíbel agravamento das secuelas. O caso remóntase a 2017, cando o home, un paciente de 64 anos de idade, foi atendido após un episodio de mareo, sudación e vómitos. A sentenza ve clara que “a primeira asistencia prestada non foi correcta”.

O director xeral da Organización Mundial da Saúde (OMS), Tedros Adhanom Ghebreyesus, anunciou esta sexta feira que a OMS declarou o fin da emerxencia sanitaria global pola Covid-19. “Onte, o Comité de Emerxencia reuniuse por decimoquinta vez e recomendou declarar o fin da emerxencia de saúde pública de importancia internacional. Aceptei este consello”, afirmou. “Non volverei a declarar a emerxencia se a situación cambia”, engadiu Tedros.

A candidata do BNG á Alcaldía de Santiago de Compostela, Goretti Sanmartín, e o deputado nacionalista no Congreso Néstor Rego anunciaron a proposta para que o Goberno do Estado, no concreto a Sareb, ceda a parcela de Peleteiro para destinala a uso público, para favorecer a construción de vivenda pública de aluguer, un centro de día, un centro sociocultural e unha praza aberta para o encontro e o lecer.

O Concello de Santiago presentou esta sexta feira o programa da celebración do Banquete de Conxo, que se levará a cabo os próximos días 12, 13 e 14 de maio con numerosas actividades e concertos. Nunha rolda de prensa no centro sociocultural de Conxo, o alcalde de Santiago, Xosé Sánchez Bugallo, agradeceu a acollida que están a ter as actividades previas ao banquete.

O arquitecto César Portela (Pontevedra, 1937) é o novo gañador da Medalla de Ouro da Arquitectura, a distinción máis importante que concede a profesión. Instituida polo Consello Superior dos Colexios de Arquitectos de España (CSCAE) no ano 1981, a Medalla de Ouro recoñece o esforzo das persoas e institucións que "ennobrecen o quefacer arquitectónico co seu labor".

Un accidente no cal se viron involucrados tres vehículos e que se saldou sen persoas feridas obrigou a desviar o tráfico na autovía entre Santiago e Brión ao seu paso polo municipio de Ames. Segundo trasladou o CIAE 112 Galiza, o sinistro produciuse ao redor das 06 horas desta sexta feira no quilómetro 4 da AG-56 no carril sentido Noia, onde chocaron un turismo e unha furgoneta.

Un operario faleceu na tarde desta quinta feira en Curtis (As Mariñas) nun accidente laboral, ao caerlle enriba unha árbore. Segundo a información do CIAE 112-Galiza, o suceso aconteceu ás 17 horas no lugar de Outeiro do Pato, en Foxados, onde o home se atopaba traballando. Ao parecer, unha árbore caeu e golpeouno na cabeza. Até a zona desprazáronse efectivos da Garda Civil, GES de Curtis e Protección Civil da localidade, así como unha dotación do 061, que só puido certificar a súa morte.

O Xulgado de Primeira Instancia número 5 da Coruña condenou o Banco Santander a devolver case medio millón de euros aos herdeiros dun matrimonio de octoxenarios emigrantes retornados que adquiriran participacións preferentes na empresa SOS Cuétara SAU e títulos de valores Santander. A resolución xudicial considera que non se transmitiu ao matrimonio información efectiva sobre o risco de perda nos produtos financeiros.

Salóns de peiteado e de estética mobilizaranse durante as próximas semanas na Galiza baixo o leva “Agora votamos nós”, coincidindo coa próxima campaña electoral, para exixir a restitución do IVE reducido para “un sector esencial cada vez máis precarizado”. En concreto, o sector sairá á rúa a vindeira segunda feira 8 de maio en Lugo, e o próximo 22 de maio en Vigo.

O Goberno estatal negou que a Xunta da Galiza solicitara formalmente a súa entrada no consello de administración da empresa pública Navantia. Así o afirma unha resposta parlamentaria a unha pregunta realizada na Cámara baixa polo deputado do BNG, Néstor Rego. Non obstante, fontes do Executivo galego rebateron esta información, asegurando que a petición formal “si foi cursada”. 

O portavoz do PSdeG no pleno da Deputación de Ourense, Ignacio Gómez, recoñeceu que a vía política pola multa ao presidente provincial, Manuel Baltar, está “esgotada” unha vez que os seus “xefes” o avalan e non o instan a dimitir, pero advertiu de que os socialistas “non van parar aquí” e avanzou que o “intentarán” na vía xudicial. Gómez incidiu en que se trata dunha cuestión “suficientemente grave” que non é un feito illado, polo que agora estudarán a vía xudicial máis apropiada.

O colectivo de persoas xubiladas e pensionistas da CIG mobilizouse na mañá desta quinta feira nas cidades da Coruña, Lugo, Pontevedra, Vigo, Compostela e Ferrol para reclamar a derrogación das reformas das pensións. Denunciaron que estas reformas teñen provocado un deterioro da contía das súas pensións e que “agora, coa inflación disparada, a maioría non chegan a fin de mes”. Por isto, xubiladas e pensionistas exixiron esta quinta feira a revalorización das pensións co IPC real.

Un condutor de 28 anos que duplicaba a taxa de alcoholemia permitida protagonizou un accidente ao atropelar un corzo cando circulaba pola estrada LU-633 ao seu paso polo municipio de Paradela (comarca de Sarria). Segundo informou a Garda Civil, o sinistro tivo lugar na estrada que une os concellos de Pedrafita e Palas de Rei. O condutor sifriu feridas leves, aínda que tivo que ser evacuado ao Hospital Lucus Augusti de Lugo.

A Confederación Intersindical Galega (CIG) volveu gañar as eleccións sindicais nas tendas Massimo Dutti da Coruña. As candidaturas da central nacionalista lograron sete das nove delegadas que se elixían para o comité e obtiveron un apoio superior a 80% dos votos emitidos. Para a CIG este resultado é consecuencia e avala o traballo sindical realizado nos últimos anos, en especial a "loita iniciada para conseguir un incremento salarial digno".

A Audiencia da Coruña xulga esta quinta feira dous homes acusados de transportar case catro quilos de heroína nun vehículo que foi interceptado en Narón. Desde entón, ambos os procesados permanecen en prisión provisional. Para eles, Fiscalía pide nove e sete anos de cárcere e senllas multas que ascenden a un millón de euros por un alixo de droga que, segundo o relato do ministerio público, podería alcanzar unhas ganancias no mercado de 391.201 euros nunha venda a terceiras persoas.

Arredor de 2.000 estudantes de centros educativos coruñeses participarán no Correlingua, cun percorrido entre Riazor e a Torre de Hércules, segundo informaron os seus promotores. Na cita estarán presente uns vinte centros educativos da cidade e concellos da comarca, como Arteixo, Cambre e Oleiros, entre outros. A saída terá lugar ás 11 horas desta sexta feira, en dirección á Torre de Hércules, onde terá lugar a festa final ao pé do monumento.

O líder do PP, Alberto Núñez Feixoo, recorrerá todas as Autonomías do Estado español, segundo avanzou o coordinador xeral do partido e director da campaña electoral, Elías Bendodo. Así, Feixoo recalará de novo na Galiza. Aínda que a súa axenda aínda non está fechada e podería haber variacións nas datas, fontes dos populares sitúan a Feixoo na Galiza arredor do ecuador da campaña. Pola súa parte, Raxoi estará en Pontevedra o día 13, e o 14, en Compostela.

O BNG rexistrou esta cuarta feira unha batería de iniciativas no Parlamento galego para exixir a Sanidade explicacións pola “intolerábel” indicación trasladada ao persoal da área sanitaria de Vigo para derivar a Enfermaría e a atención telefónica as urxencias de crianzas que chegan a centros de Atención Primaria onte non hai pediatras. Sanidade admite que se traballa cos profesionais para “matizar” esa “guía de actuación”, mais a formación nacionalista exixe a súa “retirada”.