París 2024: entrevistas

O remeiro Rodrigo Conde (Moaña, 1997) meteuse esta terza feira na final do dobre scull cunha soberbia regata na que o bote que comparte co catalán Aleix García demostrou ser o máis regular de principio a fin. Agora a parella non pensa noutra cousa que en subir ao máis alto do podio esta quinta feira.

Poucos exemplos hai no deporte de alto nivel como o de Ester Navarrete (Vigo, 1990), que debutou nunha maratón gañando, logrando a mínima olímpica e asinando a segunda mellor marca estatal da historia e mellor da Galiza. A viguesa, que foi nai en 2021, demostra que non ten teito e aspira a seguir facendo historia nos seus primeiros Xogos Olímpicos, en París.

O de Carolina García (Pontevedra, 1999) é un caso fóra do común: non sabe ben como, pero consigue sacar tempo para adestrar ao máis alto nivel no piragüismo e estudar Biomedicina e Neurociencia. Ambición non lle falta, pois confía en lograr unha medalla en París e xa se ve cunha carreira investigadora dentro duns anos.

A pesar da súa curta idade, Caetano Horta (Noia, 2003) disputará en París os seus segundos Xogos Olímpicos. Estreouse con só 18 anos en Toquio e regresou cun diploma olímpico. Agora, da man do catalán Dennis Carracedo, o remeiro noiés aspira a subir ao máis alto do podio.

Ourense non ten porto de mar, pero aí naceu en 1984 a regatista Támara Echegoyen, que en Londres 2012 esnaquizou xunto coas coruñesa Sofía Toro e a asturiana Pumariega un histórico teito de cristal gañando unha medalla de ouro que fixo dela unha lenda vivinte do deporte galego.

A carreira de Antía Chamosa (Pontevedra, 1999) parece non ter teito. Este ano bateu dous novos récords galegos en 10 km e 20 km logrando unha prata no Estatal, no primeiro caso, e un bronce por equipos na Copa do Mundo, no segundo. Uns rexistros que lle valeron o billete a París para a nova proba de remuda mixta de marcha.

Os de París serán os segundos Xogos Olímpicos para o boxeador Enmanuel Reyes Pla (A Habana, 1991), cubano de nacemento e coruñés de 'adopción'. O seu único obxectivo é lograr a medalla que se lle escapou en Toquio cando foi eliminado polo campión olímpico en cuartos nun combate decidido aos puntos.

O nome de Begoña Fernández (Vigo, 1980) era sinónimo de liderado cando saltaba á pista de balonmán, pero tamén o é a día de hoxe no seu traballo de auxiliar de enfermería, no que emprega os valores e coñecementos que adquiriu ao longo dunha traxectoria deportiva que tocou teito coa medalla de bronce en Londres '12.

O nome da coruñesa Sofía Toro (1990) forma parte do acervo deportivo común dos e das galegas por ser a primeira muller -honra que compartiu coa ourensá Támara Echegoyen- en gañar unha medalla olímpica, un ouro en vela nos Xogos disputados en Londres no ano 2012.

O remeiro Rodrigo Conde (Moaña, 1997) renunciou aos Xogos Olímpicos de Toquio polas dificultades, físicas e psicolóxicas, para manter o peso requirido para competir no dobre scull lixeiro. Agora terá unha nova oportunidade en París, onde chega co aval dunha prata no Europeo deste ano en Szeged (Hungría) e un bronce na Copa do Mundo de Lucerna (Suíza), agora loitando na categoría absoluta da man do catalán Aleix García.

Marta Bobo (Ourense, 1966) é historia viva do deporte galego. Ximnasta rítmica, con apenas 18 anos converteuse en 1984 na primeira muller galega en participar nuns Xogos Olímpicos, onde as malas artes da organización estadounidense impedíronlle volver cunha medalla colgada do pescozo.

O padexeiro Manu Ochoa (Tomiño, 1998) será o único representante galego en París dunha modalidade de piragüismo que se estrea nestes Xogos, o kayak cross. A Federación de Piragüismo elixiuno esta segunda feira para ocupar a praza que el lograra na Copa do Mundo de Praga, onde se fixo co ouro.