A guía da Eurocopa 2024: Grupo 'C'

Héctor Pena

08/xuño/24 - 08:39 Actualizado: 14/xuño/24 - 16:03

Seguinte

O francés Raymond Poulidor foi un dos mellores ciclistas das décadas dos 60 e 70 do século XX, mais pasou á historia non polos 189 triunfos que logrou ao longo da súa carreira, senón por ficar sempre ás portas de conquistar o Tour de Francia, onde foi segundo en tres ocasións e terceiro en cinco.

Desde entón díselle que padece a 'Síndrome de Poulidor' a todo aquel deportista ou equipo que a pesar do seu potencial e o seu destacado rendemento non logra alcanzar a gloria, definición que lle encaixa como unha luva á selección inglesa de fútbol.

Southgate deixou fóra da convocatoria o desequilibrante Jack Grealish

Sen levantar un título desde o Mundial de 1966, a actual xeración de futbolistas dos Pross combina a descarada xuventude de talentos xa contrastados como Cole Palmer ou Jude Bellingham cunha solvente veteranía que representa Harry Kane, factor que, unido á súa condición de vixente finalista do torneo, fai de Inglaterra a gran favorita, só por detrás da todopoderosa Francia.

Enfronte terá tres equipos de nivel medio que, se ben non deberían pór en perigo a clasificación do combinado dirixido por un cuestionado Southgate, venderán cara a súa pel para lograr a asegurarse o segundo posto.

Dinamarca, campioa en 1992, ten moi complicado repetir a xesta de 2021, cando chegou ás semifinais

Dinamarca buscará resarcirse da súa eliminación nas semifinais da Euro 2021 a mans da propia Inglaterra, aínda que os escasos minutos disputados esta tempada no Manchester United pola súa alma e corazón, Christian Eriksen, xunto ao envellecemento conxunto das estrelas do bloque, aumentan as incógnitas arredor da campioa en 1992.

Serbia e Eslovenia, pola súa parte, regresan á gran cita continental após 24 anos de ausencia lideradas por xogadores do talento de Vlahovic e Mitrovic -no caso serbio- ou de Šeško -no esloveno-, mais tamén coa bitola de ser capaces do mellor e do peor.