A cara máis negra do fútbol, a violencia, volveu facer acto de presenza na Galiza esta pasada fin de semana durante o encontro correspondente da fase de ascenso á Primeira Galega que enfrontou o Rácing Vilalbés B contra o San Ciprián.
O choque foi suspendido logo dun violento estoupido sobre o terreo de xogo despois de que un xogador do filial da formación de Vilalba propinase unha dura puñada na cara a un rival, que caíu redondo. Inmediatamente, e como dirían na Arxentina, comezou unha tangana na que incluso estiveron implicados afeccionados que saltaron desde as bancadas, o que obrigou á intervención da Garda Civil.
A gravidade da situación levou a Xunta da Galiza a convocar a Comisión Galega de Control da Violencia, co fin de "determinar coa maior precisión posíbel" os feitos acaecidos o pasado domingo no campo da Fonte, en Cospeito.
