O Goberno español prepara dous cambios normativos para regular o aluguer temporal e o turístico. Isabel Rodríguez, ministra de Vivenda e Axenda Urbana, anunciou esta fuarta feira, por unha parte, unha "reforma cirúrxica" da lei de propiedade horizontal -que regula as comunidades de veciños- para dar poder de veto á veciñanza sobre a instalación dunha vivenda de uso turístico e, por outro, a aprobación no Consello de Ministros dun decreto-lei que obrigue a xustificar a causa do arrendamento na firma dun contrato de media estancia.
"Queremos empoderar os veciños, que sexa determinante a opinión dos propietarios para implantar unha actividade económica nos seus predios. Garantir o dereito de autorización ou de veto a este tipo de actividades económicas", matizou Rodríguez, que anunciou que manterá encontros coas plataformas en liña, afectados e axentes sociais para redactar o cambio normativo.
Ademais, anunciou que está prevista a creación dunha plataforma única na que constarán todos os inmóbeis alugados en modalidade turística, que se arrendan en plataformas como Airbnb ou Booking.
Calcúlase que esta plataforma única lista antes de final do vindeiro ano, aínda que a directiva europea que obriga a creala permite facelo até decembro de 2026, e que esta inclúa, non só pisos turísticos, senón tamén pisos en aluguer temporal.
Os contratos temporais lexislaranse tamén no real-decreto que prepara o Goberno español, e está previsto que se aprobe no Consello de Ministros antes de final de verán.
Con esta reforma preténdese evitar que os propietarios eviten as restricións dos contratos habituais, regulados na lei de arrendamentos urbanos, pasándoos a media estancia, rexidos por normativa civil. "Queremos tramitalo con rapidez no seo do Goberno, dándolle toda a celeridade posíbel e respectando a participación pública", sinalou Rodríguez.
"É necesario estabelecer todos os mecanismos para non burlar a lei de arrendamentos urbanos e salvagardar os aloxamentos de tempada para o que realmente son: persoas que por cuestións laborais ou académicas requiren durante un tempo un aluguer distinto á súa residencia habitual", manifestou a ministra. "Será necesario acreditar esta causalidade: por exemplo, unha estancia dun ou dous meses por un festival cultural, de nove por un curso escolar, ou de máis dun ano por un traballo de investigación", explicou Isabel Rodríguez.
