O portavoz de Industria do Grupo Socialista, José Luis Méndez Romeu, denunciou que a Xunta destine 5,5 millóns de euros en salarios para altos cargos e persoal eventual sen identificar. Méndez Romeu criticou que mentres Feijóo “predica transparencia sobre Bárcenas, practica a opacidade sobre os seus colaboradores”, xa que “a día de hoxe non sabemos quen son nin que tarefa desempeñan uns traballadores de confianza de Feijóo que absorben 5,5 millóns de euros do orzamento de todos os galegos e galegas”. Lembrou que o goberno galego “está obrigado por Lei a facer públicos estes datos”.
O socialista advertiu que o goberno galego incumpre a Lei de Transparencia "mesmo co propio conselleiro de Economía e Industria e os altos cargos do seu departamento, que non aparecen no portal web do goberno galego". Lamentou, aliás, que este escurantismo sexa a “norma xeral” do goberno de Feijóo, que tan só identifica na web "as retribucións do 15 por cento dos altos cargos e traballadores eventuais".
“Incumpren todas as obrigas éticas e legais"
O parlamentar advertiu ademais que os organismos autónomos do goberno galego “eluden publicar as retribucións dos seus altos cargos, incumpren a obriga de presentar unha memoria anual de actividades e se permiten incrementos salariais disparados”. Sinalou que estes entes “incumpren todas as obrigas éticas e legais ás que se debe a administración autonómica”.
