O da autopista que conecta o eixo atlántico é "un abuso" ao entender do BNG. Así o volveron denunciar as deputadas da organización frontista, Ana Pontón e Rosana Pérez, após presentaren a iniciativa lexislativa coa que o Bloque demandará a transferencia da AP-9 a Galiza. "Non é un problema legal" que as competencias sobre a xestión do vial non pasen a Galiza "é un problema de vontade política", afirmou Pontón.
Desde a organización frentista lembran que o Estatuto de autonomía de Galiza e a Constitución español recollen a competencia do goberno galego para xerir as súas conexións interiores.
O Bloque denuncia o "abuso"
A razón que motiva a iniciativa presentada polo grupo nacionalista reside na vontade d@s nacionalistas por rematar cunha "historia", a da AP-P, marcada pola "neglixencia" a "discriminación" e o "abuso", denunciou Pontón. E é que o mantemento e conservación da vía custará á Xunta máis de 829 millóns de euros en 2015. Cifras como os beneficios da empresa concesionaria que supoñen "dezasete veces máis" que o investido polo executivo de Núñez Feijóo en investigación.
A Xunta paga en concepto de mantemento e conservación da vía 829 millóns en 2015
Un "abuso", di, se a esa cifra se lle engade o diñeiro recadado pola concesionaria, Audasa, através da peaxe. Segundo as estimacións do BNG, a empresa recolleu 320 mil euros ao día o pasado 2014 ou o que é o mesmo máis de 116 millóns de euros en todo o ano.
4 mil millóns de beneficios
Até rematar a concesión, apuntan as deputadas nacionalistas, Audasa obterá por volta dos 4 mil millóns de euros saídos dos petos das utentes. Un "auténtico abuso" ao que lle queren pór fin desde o BNG através da transferencia da vía á Xunta de igual maneira que a A-8 foi transferida ao goberno da Comunidade autónoma vasca.
Desde o Bloque afirman que Audasa non está a ofrecer un servizo polo que se está a pagar como reflectiron os engarrafamentos do verán. "A xestión que se está a dar desde Madrid é a proba de non se está a resolver un problema que para nós é vital", dixo Rosana Pérez.